‘n Muis in die huis

Kinderversies
Franci Greyling

‘n Muis in die huis

“Hier’s ‘n muis in die huis!” skree ma verskrik
en spring op die stoel dat die pote ruk, 
dat die koppies van die tafel val
en die muisie woerts by die deur uit nael.

“‘n Muis in die huis?” roep pa verbaas.
“Is dit die rede vir die groot geraas?
Gee hier die besem, bring die flits!
Ek jaag hom weg – die stoute klits!”

“Hier’s ‘n muis in die huis,” sê ek te bly.
“Nou gaan ek tog ‘n geldjie kry.
In my tekkie, onder die bed,
dis waar ek my voortand het…”

“Hier’s ‘n mens in die huis!” piep muis verskrik
en hol deur die gang dat sy stertjie wip
“Waar is die kamer, waar is die tekkie 
waar is die beste wegkruipplekkie?”

“EEEEEEEEEEEEEEEAAAAAAAAAA!”

Franci Greyling
2008-12
Kopiereg Franci Greyling

As jy dié stuk wil opvoer, stuur ‘n versoek aan kollig@storiewerf.co.za
met jou naam, ouderdom, die titel, en waarvoor jy dit wil gebruik.