In ZAK Die reis na Zenkio , skepTheresa van Baalen ʼn asemrowende fiktiewe wêreld waarin die leser homself kan inleef. Die nuwe planete, ander ruimtewesens en die romanse tussen Mitch en Imke, sorg vir ʼn jeugroman gelaai met aksie en avontuur.

Met die eerste boek in die reeks, ZAK Die Blou Planeet, was die voorblad volgens my nie voldoende nie, maar met ZAK Die reis na Zenkion werk die voorblad hand aan hand saam met die inhoud van die boek. Die drie karakters op die voorblad is ʼn identiese uitbeelding van hoe hulle in die boek beskryf word. Selfs die agtergrond is ʼn goeie voorstelling van hoe die planeet Zenkion lyk.

Die boek gee ook ʼn skematiese voorstelling van die verskillende fiktiewe planete, asook kort verduidelikings van die planete en hul bewoners. Hierdie inligting maak die verhaal meer geloofwaardig en help die leser om die verskillende planete en hul bewoners beter te kan konseptualiseer.

Die verhaal begin in die ruimte. Daar is egter fout met die tuig waarin Mitch, Lionel en die ander Zenkioniete vaar, en hulle besluit om ʼn noodlanding te maak op ʼn nabygeleë asteroïde. Ná die noodlanding word Mitch en Lionel toegerus met ruimtepakke en hulle besluit om saam met Imke die asteroïde te verken. Dinge loop egter skeef, maar Imke en Mitch word deur twee Anuras gered, ene Grol en Slom. Die ontmoeting met hierdie twee ruimtewesens bring Mitch-hulle in konflik met die Amplusiërs. Dilanté, Imke se pa se vriend wat jare terug verdwyn het, tree in om te help baklei teen die Amplusiërs. Nadat Mitch-hulle die Amplusiërs oorweldig het, stuur hulle die ruimtetuig in die rigting van Zenkion. Hierdie is die begin van Operasie Zenkion.

Hierdie opvolg jeugverhaal bring die leser in ontmoeting met meer ruimtewesens en ruimtetuie en die groeiende liefde tussen Imke en Mitch word ook teen die einde van die boek meer uitgebring. Ek kan nie help as om te wonder wat se geheime op Zenkion versteek word nie.