Ter viering van Storiewerf se 21ste verjaarsdag, het skrywers die kans gekry om hulle kreatiwiteit vlerke te gee en in skryf vir die Storiewerf 21 skryfkompetisie. Deelnemers kon kies om ʼn storie te skryf vir haasbekkies – ʼn afdeling vir jong lesers en kleuters – of grilgrot, vir die avontuurlustige en dapper leser. Deelnemers kon ook kreatief te werk gaan om illustrasies saam met hul storie in te stuur.
Deelnemers kon in drie ouderdomskategorieë inskryf: Laerskool, Hoërskool of Volwassenes. Die FAK (Federasie vir die Afrikaanse Kultuurvereniginge) het die prysgeld ter waarde van R10 000 vir die kompetisie geborg. Die wenner in elke kategorie ontvang R2000, die tweede plek R800 en die derde plek R500.
Die beoordelaars is werklik beïndruk met die gehalte van die inskrywings en met die moeite wat die skrywers en illustreerders gedoen het. Dit was moeilik om slegs drie kategoriewenners uit soveel besonderse inskrywings te kies.
Die eerste prys in die laerskoolafdeling gaan aan Marisa Loubser (13), ʼn graad 7 tuisonderrigleerder, met haar storie Geheim in die bos. In die tweede plek is Elmé Steyl (12), ook ʼn tuisonderrigleerder in graad 6, met Die waterwese. In die derde plek is die 11-jarige Simon van Dyk, ʼn graad 6 leerder van Laerskool Jan van Riebeeck in Kaapstad, met sy storie, Rooi oë in die nag.
In die hoërskoolafdeling is Laura Kruger (17), tans in graad 11 in Hoërskool Potchefstroom Gimnasium, die wenner met haar storie, Die Doolhof. Bea Badenhorst (15), ʼn tuisonderrigleerder in graad 9, spog met haar storie, Bartel Beer bak kluitjies, in die tweede plek. Die derde plek gaan aan Merize Beukes (18), ʼn matriekleerling in Hoërskool Ben Viljoen in Groblersdal, vir Nina se vellie avontuur.
In die volwassekategorie ontvang Berdina Olivier die eerste plek met haar storie, Een is gelyk aan ses. In die tweede plek is dit Martelize Faber se Maanpêrels en in die derde plek Helena Mellet met Petronella, die vlakwaterpadda.
Storiewerf wens al die wenners van harte geluk.
Die eerste verhale (die drie afdelingswenners) kan vanaf Septembermaand in grilgrot gelees word. Die res van die wenverhale word in Oktober en November op Storiewerf geplaas.
Baie dankie aan elke talentvolle deelnemer wat ingeskryf het en bereid is om lees lekker te maak.
Die kompetisie is aangebied in samewerking met die FAK en die Vakgroep Skryfkuns aan die Noordwes-Universiteit (NWU).
