Marga Jonker is gebore op 6 Februarie 1964 op Vredenburg aan die Weskus. Sy het grootgeword op ‘n plaas tussen Paternoster en Stompneusbaai.  Sy het gematrikuleer aan die Hoërskool Vredenburg in 1981. Sy het ‘n onderwysdiploma aan die Wellington Onderwyserskollege, ‘n BA graad met Xhosa en Geskiedenis aan die Universiteit van Stellenbosch, en ‘n Verdere Diploma in Vroeë Kinderontwikkeling aan die Randse Afrikaanse Universiteit verwerf.

Marga is tans die Xhosa derdetaal-onderwyseres aan die Voorbereidingskool Durbanville waar sy graad 2- en 3-kinders bekendstel aan Xhosa as derde taal. Sy skryf en ontwikkel die kurrikulum hiervoor en maak rympies en stories om by haar materiaal te pas. Sy glo veeltaligheid lei tot multi-kulturele ontwikkeling. Sy wou van kleins af graag skryf en het gedigte in haar dagboeke geskryf. Sy het egter eers in haar veertigerjare dapper genoeg gevoel om van haar werk in Afrikaans aan uitgewers voor te lê.

’n Prenteboek, Wat is jy Kartoffel, (Lapa Uitgewers, 2010) deur die skrywer en die illustreerder Alzette Prins is deur die Namibiese Kinderboekforum bekroon. 

Marga en haar eggenote, PG, woon in Durbanville saam met hulle drie kinders,  Hardus, Anita en Chris-Jan. 

Publikasies
 
Mede-outeur van drie Xhosa kinderboeke, uitgegee deur Kagiso Uitgewers in 1996. Ibhola kaThemba, Bamba uBaleki, Themba!, en UThemba uneminyaka emihlanu,  Marga Jonker, Lesley Krige, Lyn de la Motte.

Marga se eerste Afrikaanse publikasie was haar storie Die Onskadelike Reënspinnekop in Baba & Kleuter  2000. 

In 2009 word twee van Marga se verse opgeneem in die Nuwe Kinderverseboek, saamgestel deur Riana Scheeprs en Suzette Kotzé-Myburgh en uitgegee deur Tafelberg.

In 2010 verskyn haar geïllustreerde kinderboek, Wat is jy, Kartoffel, in hardeband, uitgegee deur LAPA.  In 2012 ontvang Kartoffel die Namibiese Kinderboekforum se toekenning vir die beste boek in die kategorie geillustreerde kinderboeke.

In 2011 word haar gedig ‘Slegs Bekendes’ opgeneem in Toulopers, saamgestel deur Jaco Jacobs, en uitgegee deur LAPA Uitgewers.

Christa Jonker-Jordaan is drie en vyftig jaar gelede, op 26 September 1956, as die jongste van vyf kinders, in Bloemfontein gebore.

Sy is reeds 35 jaar getroud met Prof. Gerrit Jordaan, wat verbonde is aan die Sentrale Universiteit vir Tegnologie, Vrystaat. Hulle het vier kinders, twee seuns en twee dogters. Hulle het twee kleindogters.

Na matriek het sy as ‘n klerk by die Ontvanger van Inkomste gewerk, maar was na haar huwelik, met die uitsondering van ‘n paar dinge wat sy van die huis af bedryf het, hoofsaaklik ma.

Sy skryf graag vanaf haar hoërskooljare gedigte en prosa. As vryskutskrywer het sy van tyd tot tyd in tydskrifte en op die internet, gepubliseer. In 1998 publiseer sy ‘n verseboek, “My valentyn dwarsdeur die jaar,”

Daarna was sy mede-outeur van verskeie publikasies soos dagstukkies en ander Christelike boeke wat deur Carpe Diem Media uitgegee is.

Einde 2005 versoek Carpe Diem Media haar om ‘n boek te skryf wat oor die lewe van ‘n ma handel. So word “‘n Ma is spesiaal” in April 2006 gepubliseer.

In Augustus 2007 sien “Lyf”, ‘n tienerfiksieboek wat onder andere oor eetversteurings gaan, die lig. Hiervoor kry sy ‘n Sanlam woordveertjietoekenning in 2008.

In Maart 2008 word Lyf, tesame met twee nuwe publikasies, “Lus” en “Luuks,” opgeneem in ‘n omnibus met die oorkoepelende naam: “Chilli Lipstiek.”

In Augustus 2008 kom ‘n dagstukkieboek waar sy as een van 12 skrywers in deel op die rak.

In Mei 2009 sien ‘n roman, “Naglig”, tesame met ‘n geskenkeboek, “Vir ‘n ma” die lig.

Haar heel nuutste boek, “Oudword is nie vir sissies nie,” het Januarie 2012 op die rak gekom.

Eersdaags, September/Oktober, sien “Chilli Lipstiek 2”, die lig.

Jaco is op die Karoodorpie Carnarvon gebore en het daar grootgeword. Hy het al op laerskool aan skryfkompetisies soos die Bloemfonteinse Skrywersvereniging se jaarlikse kompetisie en die ATKV se skryfwedstryd deelgeneem. Hy het albei hierdie kompetisies op hoërskool gewen, en ook die Poortprys vir prosa en poësie van die Suid-Afrikaanse Akademie vir Wetenskap en Kuns ontvang. In 1998 was hy hoofseun van die Hoërskool Carnarvon (uit ’n klas van net 14 matrieks, voeg hy altyd baie vinnig by!), en in sy matriekjaar het hy begin om vir tydskrifte soos Sarie verhale te skryf.

Ná skool het hy B.A. (Kommunikasiekunde) aan die Universiteit van die Vrystaat gestudeer. In 2001 het sy eerste jeugboek, Troetelgedrog, by LAPA Uitgewers verskyn. In 2002 het hy sy honneursgraad in Afrikaans en Nederlands aan die UV voltooi. Hy was daarna redakteur van JIP en die boekeblad by Volksblad in Bloemfontein, en deesdae is hy uitgewer van kinder- en jeugboeke by LAPA.

Jaco woon in Bloemfontein saam met sy vrou, Elize, sy twee dogters, Mia en Emma, en twee honde, Pippie en Binki. As hy nie skryf nie, hou hy hom besig met DVD’s kyk, lees en wat ook al sy kinders lus het om te doen!

Sy skryfwerk is onder meer bekroon met die Alba Bouwerprys, die C.P. Hoogenhouttoekenning, die MML-letterkundeprys en sewentien ATKV-kinderboektoekennings. Hy het, benewens kortverhale, rubrieke en joernalistieke werk, al meer as 100 kinder- en jeugboeke die lig laat sien (sommige daarvan onder skuilname) en meer as 200 boeke in Afrikaans vertaal. Van sy kinderverse is deur Anna Davel getoonset en opgeneem as ’n kinderalbum getiteld In die land van Kammalielie. In 2014 word ’n fliekweergawe van sy jeugboek Suurlemoen! vrygestel.

Die volgende titels het, benewens kortverhale, vertalings en joernalistieke werk, uit Jaco se pen verskyn:

• Troetelgedrog (LAPA, 2001)
• Duskant die doodlyn (LAPA, 2001)
• Rugbypret (LAPA, 2001)
• Tande (LAPA, 2002)
• Hoe wyd kan ’n seekoei se bek ooprek? (LAPA, 2002)
• Pretpark (Human & Rousseau, 2003) – ATKV-kinderboektoekenning
• Hoe hoog kan ’n sprinkaan spring? (LAPA, 2003)
• Superheroes vlieg net saans (LAPA, 2003)
• Krieketpret/Gevaarlike lopies (LAPA, 2004)
• Nag van die monsters (LAPA, 2004) – ATKV-kinderboektoekenning
• My ouma is ’n rock-ster (LAPA, 2004) – ATKV-kinderboektoekenning
• Wiskunde gee my maagpyn (LAPA, 2004)
• Net aliens eet spinasie (Human & Rousseau, 2005)
• Wurms met tamatiesous en ander lawwe rympies (LAPA, 2005) – CP Hoogenhoutmedalje, Alba Bouwerprys
• Nagvlerke (LAPA, 2005)
• Die heel beste toebroodjie (LAPA, 2006)
• Hoeveel tande het ‘n krokodil? (LAPA, 2006)
• Supersterre (Vivlia, 2006)
• Suurlemoen! (LAPA, 2007) – IBBY-ereboek 2007
• Monstergrappe (LAPA, 2007)
• Verneukpan (Maskew Miller Longman, 2007) – MML-letterkundeprys 2007
• Danie Dreyer se dinosouruseier (LAPA, 2007) – ATKV-kinderboektoekenning
• Troeteldiere: ’n Gids vir beginners (LAPA, 2007)
• Voelers (Grille & Goeters 5) (LAPA, 2007)
• Bertie Blikbrein (LAPA, 2008)
• Suzie se superdoeper-sjampoe (LAPA, 2008)
• Die Teddiebeerbus (LAPA, 2008)
• Liewe land, ’n olifant! (LAPA, 2008)
• Borrels (LAPA, 2008)
• Pasop vir die feetjies! (LAPA, 2008)
• Perfek (LAPA, 2009) – ATKV-kinderboektoekenning
• Bertus soek ’n boek (LAPA, 2009)
• Virus (LAPA, 2009)
• Middernagfees (LAPA, 2009) – ATKV-kinderboektoekenning
• Zackie Mostert en die ongelooflike kulkunsie (#1) (LAPA, 2010)
• Zackie Mostert en die (byna) Baie Briljante Idee (#2) (LAPA, 2010)
• Zackie Mostert en die super-aaklige soen (#3) (LAPA, 2010)
  Harlekyn (Tafelberg, 2010) – Wenner: NB/Klein-B-skryfkompetisie
• Oempakadoempa – rympies vir pret en plesier (LAPA, 2010)
• Madelief, moenie! (LAPA, 2010)
• ’n Kas vol monsters 1: Die groen hand (LAPA, 2010)
• ’n Kas vol monsters 2: Vampierfoto’s (LAPA, 2010)
• My boetie dink hy’s Batman en ander rympies (LAPA, 2010)
• Wat weeg ’n walvis? (LAPA, 2011)
• Slaaptyd, Matilda (LAPA, 2011)
• Zackie Mostert en die Gemaskerde Groen Gevaar (#4) (LAPA, 2011)
• Zackie Mostert en die spokerige storie (#5) (LAPA, 2011)
• ’n Kas vol monsters 3: Hollywood-mummie (LAPA, 2011)
• ’n Kas vol monsters 4: Weerwolfprobleme (LAPA, 2011)
• Haasmoles (LAPA, 2011) (ATKV-Kinderboektoekenning 2012)
• ’n Kas vol monsters 5: Die perfekte monster(LAPA, 2012)
• ’n Kas vol monsters 6: Kinderspeletjies (LAPA, 2012)
• Professor Fungus en die zombie-tamaties(LAPA, 2012)
• Professor Fungus en die ongelooflike miniatuur-avontuur(LAPA, 2012)
• Waarvoor is seerowers bang? (LAPA, 2012)
• Zackie Mostert druk ’n drie(#6) (LAPA, 2012)
• Zackie Mostert se groot grapboek(LAPA, 2012)
• Bastian Blom en die pratende portret(LAPA, 2012)
• Bastian Blom en die gillende geraamte(LAPA, 2012)
• Bennie Brink en die seerowerskat (Via Afrika, 2012)
• Basjan en Bella (Via Afrika, 2012)
• Vis & tjips(LAPA, 2013)
• Professor Fungus en die mensvreter-piranhas(LAPA, 2013)
• Professor Fungus en die skrikwekkende Snotzilla(LAPA, 2013)
• Zackie Mostert en die geheimsinnige gedaante(#7) (LAPA, 2013)
• Bastian Blom en die woedende weerwolf(LAPA, 2013)
• Bastian Blom en die Magtige Moerasmonster(LAPA, 2013)
• Meneer Monster (LAPA, 2013)
• Oor ’n motorfiets, ’n zombiefliek en lang getalle wat deur elf gedeel kan word(LAPA, 2013)
• Onverklaarbaar! Feite en vrae oor vreemde verskynsels(LAPA, Oktober 2013)
• Zackie Mostert en die wriemelende wurmkoekies (LAPA, 2014)
• Professor Fungus en die dino-avontuur (LAPA, 2014)
• Professor Fungus en die robotkrisis (LAPA, 2014)
• Superboetie (LAPA, 2014)
• Holderstebolder: rympies vir rakkers (LAPA, 2014)
• Kougom in my hare en ander rympies(LAPA, 2014)
• Koebaai, Gorilla (LAPA, 2014)
• Zackie Mostert en die meisiemoles (#9) (LAPA, 2014)
• Zackie Mostert en die baie beroemde hond (#10) (LAPA, 2014)
• My ouma is ’n film-ster (LAPA, 2015)
• Professor Fungus en die jelliemonsters van Mars (#7) (LAPA, 2015)
• Professor Fungus en die BreinDrein-eksperiment (#8) (LAPA, 2015)