Wilhelm Otto Kühne is in 1924 gebore in die distrik Graaf-Reinet. Na vier jaar in die onderwys tree hy toe tot die redaksies van Die Burger, onder andere as seiljagverslaggewer, Die Huisgenoot en Sarie Marais. In Die Klein Burger verskyn, toe hy nog onderwyser was, sy eerste kinderverhale. In 1960 redigeer hy ‘n tydlank Die Jongspan en maak ook self bydraes. Hy is in 1951 met Dorothy Margaret Hill, die bekende kinderboekillustreerder, getroud. Sy het ook die meeste van sy boeke geïllustreer.

W.O. Kühne is by uitstek bekend vir sy ses Huppelkind-boekies:Huppelkind (1958), Huppel maak ‘n plan (1958), Wip-Huppel-Wip(1959), Vrolike Huppelkind (1959), Huppel by die water (1960) en Huppel verjaar (1960) wat almal by Tafelberg verskyn het. Die verhale word in versamelbundels opgeneem in 1976 (Vrolike Huppelkind), 1982 (Huppel en sy maats, herdruk in 1988), en in 1995 in ‘n tweede hersiende uitgawe. Kühne was die eerste ontvanger van die C.P. Hoogenhout-toekenning vir Huppel verjaar. Dorothy Hill, sy vrou, het al die publikasies geïllustreer, behalwe die 1995-uitgawe met illustrasies van Alida Bothma.

Hoera vir Klaas Jas! (1975), Piet-‘n-Jan (1975), Die wonderbaarlike motor van Barnabas Bombas (1981), Pot, graaf en houtvurk (1983) en Pip in Otterland (moontlik 1983) en Eendag was daar ‘n witborskraai: ‘n fantasieverhaal (1985) is ook op die jonger kind toegespits. In 1960 publiseer Kühne sy eerste jeugboek, Kassie Krog in die knyp.

Die kring van Keerom (1962) was medewenner saam met Die goue protea van Mikro van die eerste prys in die wedstryd vir jeugverhale wat die Nasionale Boekhandel in 1961 uitgeskryf het om die verskyning van die eerste Afrikaanse boek in 1861 te herdenk. Dit het twee uitgawes en twaalf herdrukke beleef.

Die reeks Die nagvlieërs (1957), Die indringers (1958) en Die mededingers (1962) is ligte avontuurverhale. In Goue fluit my storie is uit: verhale, verse en raaisels vir kinders (1988) waarvan Linda Rode die samesteller was, publiseer Kühne ook ‘n hervertelling van die Icarus-verhaal onder die titel Die jong man wat te hoog wou vlieg.

Kühne het ook ‘n aantal kleuterboeke vertaal of oorvertel, soos Die flukse kabouters van Keulen (1969), My prentepoetseboek (1976) met verse en manupileerbare prente, en vier boekies in die reeks Bybelstories vir die kleinspan, naamlik Die geboorte van Jesus, Moses in die mandjie, Dawid en Goliat en Die kindertyd van Jesus, almal uit 1982.

PUBLIKASIES SLUIT IN:

• Die nagvlieërs (1957)
• Die indringers (1958)
• Huppelkind-reeks (1958-1982)
• Kassie Krog in die knyp (1960)
• Die mededingers (1962)
• Die kring van Keerom (1962)
• My prentepoetseboek (1976)
• Die wonderbaarlike motor van Barnabas Bombas (1981)
• Die waterskeiding (1981)
• Pot, graaf en houtvurk (1983)
• Eendag was daar ‘n witborskraai: ‘n fantasieverhaal (1985)
• Goue fluit my storie is uit: verhale, verse en raaisels vir kinders (1988)

C.P. Hoogenhout-toekenning vir Huppel verjaar

Karl August Kielblock op 23 Oktober in Beaufort-Wes gebore as die naasjongste van elf kinders. Sy skoolopleiding geniet hy op die dorp en hoewel hy aanvanklik joernalis wou word, bekwaam hy hom as onderwyser aan die Paarlse Onderwyskollege en word in 1928 by die Sekondêre Skool (later Laerskool Hendrik Louw) in die Strand aangestel. Hier ontmoet hy ook sy vrou, Susan Vera Abel, ‘n onderwyseres. Hulle is in 1939 getroud en het twee kinders. Kielblock tree aan die einde van 1967 as onderhoof by die Laerskool Hendrik Louw af. Hy was ook lief vir sport en het lank betrokke gebly by die administrasie van tennis. Die egpaar woon tot met die afsterwe van Kielblock op 27 November 1991 in die Strand.

Meer as 40 boeke het uit Kielblock se pen verskyn. Van kleins af was hy lief vir lees en het ‘n begeerte gehad om te skryf. Na aanmoediging van sy vriend, Mikro, begin hy publiseer, aan die begin meestal kortverhale en sketse. Van die hoogtepunte in sy loopbaan was die Scheepersprys wat hy in 1970 vir Rebel (1969) ontvang het en die verfilming van onder andere die Jasper le Feuvre-reeks vir televisie.

Die skat van Java (1936) was een van die gewildste avontuurverhale in Afrikaans. Verskeie spannings- en speurverhale volg hierna, onder andere Jasper le Feuvre (1942), Moord op Eendevlei (1943) en Moord op Kroonbaai (1945).

Hoewel die bogenoemde romans, en die meeste van sy ander werk, vir volwassenes bedoel was, het die Afrikaanse jeug dit baie gou hulle eie gemaak. Resensente het dit ook dikwels vir die jeug aanbeveel, soos in die geval van Die skat van Java (J.W. 1936), Mooier as blomme (1961) (R.N. 1961) en Die vete (1962) (Hudson, 1963). Die radioverwerking van Die skat van Java was so gewild, dat daar in Die Jongspan daaroor berig is. Die jeug eien dit vir hulle op en Kielblock kom hulle as’t ware tegemoet met Die verlore skat (1964) wat by die verhaalgegewe van Die skat van Java aansluit, maar ‘n jong seun as held het.

PUBLIKASIES SLUIT IN:

• Guillam Woudberg
• Jasper le Feuvre-reeks
• Lafras Cuyper-reeks
• Moord op Kroonbaai
• Nooi uit die vreemde
• Onder die stil waters
• Onrus op Rusdal
• Rebel
• Rivier van drome
• Die skaam man
• Die skat van Java
• Skuil in die skaduwees
• Die swaard verteer
• Vaandrig Freyn
• Verhale uit Herodotos
• Weerlig slaan twee maal

Chris Karsten is op 9 November 1947 op Morgenzon gebore. Hy matrikuleer aan die Hoërskool Hoogenhout op Bethal en behaal ‘n B.A.-graad met Afrikaans-Nederlands en Sielkunde aan die Universiteit van Pretoria (1970). As koerantjoernalis by die Volksblad, Beeld en Rapport reis hy wêreldwyd. Hy woon saam met sy vrou, drie seuns, hond, kat voëltjie, en vyf visse in Westdene in Johannesburg.

Floris Sapiens: ‘n fantasie (1985) is ‘n wetenskapsfiksieverhaal wat uniek in Afrikaans is. Dit verwerf in 1985 die Sanlamprys vir jeuglektuur (silwer). Die jokkie wat met perde kon praat (1997) is ‘n avontuurverhaal oor ‘n seun wat met perde kan praat.

PUBLIKASIES SLUIT IN:

• Floris Sapiens: ‘n fantasie (1985)
• Die jokkie wat met perde kon praat (1997)

Sanlamprys vir jeuglektuur (silwer) in 1985 vir Floris Sapiens: ‘n fantasie (1985)