Selfone, skelms & sjokolade is 'n spanningsverhaal oor die lewe van vyf hoërskoolmeisies (Lindie, Mia, Talita, Andrea en Gina) verbonde aan Hoër Meisieskool Bergrif. Ná die vakansie het Gina teruggekom met 'n baie "weird" haarstyl waarvoor haar maats lekker gelag het. Haar niggie wil 'n haarkapper word en het 'n oefenlopie op haar uitgeoefen. Daar is twee geheimsinnige mans wat Talita-hulle aanhoudend en tot in die Menlyn-winkelsentrum agtervolg, want haar stiefpa skuld hulle blykbaar geld. Diaan, een van julle maats, het gesien dat die twee geheimsinnige mans Talita-hulle gejaag het en het tot hul redding gekom. Diaan en Lindie raak verlief. Almal het gedink dat George (die nuwe sekuriteitswag by die skool) verlief was op Talita, maar hy was eintlik een van die skelms. George gebruik die loper om in te gaan net waar hy wil en sluit vir Talita toe. Sal sy kan ontsnap? Ek hou van die boek, want daar gebeur snaakse dinge. Dit maak meisies bewus van wat in die werklike lewe met 'n mens kan gebeur. Die taalgebruik is tipies soos ons tieners praat.

Karien Oosthuizen (13)

Oorleef op die see is 'n baie interessante boek met klomp feite. As jy 'n avontuurlustige persoon is, is die boek beslis vir jou. Die boek het 'n goeie hardebandomslag met golwe op die voorkant. Binne is baie mooi prente. Die boek sê vir jou hoe om uit 'n sinkende boot te kom en het baie idees vir oorlewing. Daar is baie selfdoentakies, bv. maak 'n lewensboei van 'n sak. Dit sê ook vir jou wat al jou benodigdhede sal wees, soos 'n sak. Daar is nog twee ander boeke in die reeks en almal het 'n klomp vrae agter in die boek. Dit is 'n baie goeie boek om iewers heen te vat saam met jou.

Paul Greeff (11)

Daar is vlooie in my bed (Janie Oosthuysen/Johan Stapelberg) 1. Die voorblad van die boek is mooi behalwe vir die oranje. 2. Die begin van die storie lok my om verder te lees. 3. Die sketse is goed gedoen en laat die storie lewe. 4. Die stories in die boek is lekker kort, snaaks en mooi geskryf. Toe die ou gesê het hy gaan honderd hase uit die hoed toor en toe kom daar honderd rotte uit en die mense so spring en skree en weghardloop het ek lekker gelag. 5. Die einde het goed afgeloop.

Marjolé Mulder (13)

Sit oom Paul! was 'n baie lekker boek. Dis die perfekte boek vir iemand wat nie iets voorspelbaars soek nie. Die boek het snaakse kinkels,draaie en swaaie wat, mens nie verwag nie, wat net ewe skielik hul opwagting maak en jou van vooraf verras. Die boek eindig op 'n snaakse noot. Dis een van daardie boeke wat jou laat wens die boek hou nooit op nie en daarby is dit onmoontlik om die boek neer te sit jy wag in spanning vir die volgende vrye tyd wat jy het sodat jy verder kan lees. Tog is die boek effens skokkend. As jy Breinbliksem gelees het en nie daarvan gehou het nie, sal ek ook nie hierdie boek aanbeveel nie

Tiané Goosen (15)

Die beste spookstories van C.J. Langehoven is 'n definitiewe treffer! n Omnibus van ware spookstories wat Langehoven self by verskeie getuies gaan luister het en oorvertaal het in Afrikaans. Daar is ook baie bekende spookstories in soos "Die spook van vergeleë" en ander. Die boek het my baie geïnteresseer asook baie laat dink aan moordstories en ander vreemde verskynsels. Ek kan vir ure voor die boek sit en nie 'n oog knip nie. Dit is 'n vervolg op 'n redelike ou en baie goeie boek. Baie mens het gedink die boek sal nie die paal haal nie, maar wie ookal so gedink het was defintief verkeerd. n Uitstekende boek deur 'n uitstekende skrywer!

Japie Kruger (11)

Jaco Jacobs skryf die mooiste stories. Mens kan sommer hoor en sien wat in die stories gebeur. Alhoewel ek 'n meisie is, hou ek baie van sy boeke. Ek het gegril toe ek uitvind dat die vlermuise 'n meisie geëet het in Nagvlerke en die stories in Net aliens eet spinasie is lekker kort om vinnig te kan lees. Hy skryf baie interessant en ek kan nie wag om nog van sy boeke te kan lees nie.

Marjolé Mulder (13)

Wat maak Carina Diedericks-Hugo so gewild? Sy is tog maar net een van ons land se top kinder skrywers en al haar boeke is wenners!! Al haar boeke het kort hoofstukke wat alles so interessant maak! Nie een hoofstuk is lank dat dit later vervelig raak nie. Ek is hoofseun van my skool en met my besige skedule het ek nagmerrie.net in een middag klaar gelees. Dis nie net haar boeke wat flippen cool is nie, maar ook sy! Wêreldboekedag is altyd so vervelig tot dit Carina se beurt is om te praat. As Hoofbiblioteek-prefek weet ek alles van boeke af. Baie mense dink as jy lees is jy 'n "nerd", maar nie by Laerskool Eikestad nie. Daar speel jy rugby en lees jouself simpel!! Ek is besig om GROOT poster van Carina en haar boeke te beplan vir ons bib. Carina in net die beste!!!

Adriaan Louw (13)

Thomas @ nagmerrie.net gaan oor Thomas, 'n tienerseun in gr.9. Die mooiste tieneraktrise in die land kom in hul skool in en lê by hom aan. Dit veroorsaak probleme tussen hom en sy meisie. Dan sit hy nog met sy nagmerries wat op mekaar volg - nie normaal!! Die lewe is hel. Sy nagmerries word bewaarheid. Die boek is FUNKY!!! As tiener moet ek sê ek sal die boek enige tyd weer lees. Daar is ons alledaagse probleme met ouers wat ons nie verstaan nie en maats wat nie luister nie en die algemeenste, ons liefdesprobleme. Drome word bewaarheid. 'n 'Famous' persoon kom in die skool in! Soos wat ek nog altyd gedink het, is die skool groot en hul ego's groter. LEES DIT, en doen jouself 'n guns!!!

Magde-Mari Greeff (15)

Hallo, ek is Retha. Ek is Rikus se sussie. Ons sit hier by Mamma by haar werk, sy doen pasiente nou speel ons op haar rekenaar en Rikus wys my hoe om in te skryf. Ek hou nog baie van Balkie en Mamma laat my al sy stories lees. Ek vertel vir Mnr Terblanche van Balkie, ons het die boek in die klas gelees en dit was lekker. Nou praat almal soos die Balkie!

Retha van der Walt (10)

My ma skryf stories. Vandat ek klein was het sy vir my stories geskryf en vertel van insekte (my favourite). As dit aand word wens ek, ek was nog klein om weer die stories te hoor. Nou word die stories weer vertel vir my suster se kinders. Al is sy nie 'n beroemde skrywer nie het haar stories vir my baie lesse in die lewe geleer. Dankie vir Afrikaanse stories.

TC Peters (14)

Hallo, Pippie Langkous. Ek is so bly dat ek met jou kan kontak maak, ek wil nog al die jare met jou praat. Ek hou verskriklik baie van jou stories! Ek sal ook so boom soos joune wil hê wat in my tuin is, en is meneer Jacobus regtig so woelig soos jy in die boek sê. Ek wil ook saam met jou op 'n skip na Koeries eiland toe gaan, en voel hoe dit is om heeltyd te jok as jy van die skip af kom. Ek dink jy is baie oulik.

Anita Jonker (9)

Ek het pas 'n boek met die naam Vyf dae in Julie klaar gelees. Dit gaan oor twee leerlinge van Linden wat geontvoer word en na Angola geneem word. Daar moet hulle probeer ontsnap, maar dit is nie vir hulle maklik nie. Hul ouers sit op 'n wildsplaas in Namibia en is dood van bekommernis. Dit is 'n uitstekende boek vir enige iemand wat hou van aksieverhale.

Sanet Strydom (14)

Verjaarsdagwedstryd 2006

Die wenners is: Karien Oosthuizen en Tiané Goosen