bygewerk 2015-01

grootmense
werfjoernaal

dinkskrum
resensies
skrywers
skakels
leeslyste
nostalgie
helpmekaar
hulpbronne

navrae
werkplaas

vanwaar gehasi?
werfkaart

boeksoek

soek

posbus


na jongklomp
 
 

kalahari

Gereelde vrae en antwoorde

Navrae oor boeke, bestellings, skrywers, ens.

Navrae oor skrywers, skoolprojekte, kunswedstryde, redenaars, ens.

Navrae oor skryfpraktyk en publikasies

Ek is op soek na leesboekies vir my kleuter. Hy is nou twee jaar oud. Ek soek spesifiek Afrikaanse boekies wat ek kan voorlees maar wat maklik hanteerbaar is.

In die afdeling Oondvars word die nuutste boeke wat in Afrikaans verskyn bekend gestel. Dalk moet jy veral kyk na Oondvars Haasbekkies en Oondvars Bababoeke.

Ek wil boeke van Storiewerf bestel. Hoe doen ek dit?

Storiewerf verkoop nie self boeke nie, maar dien slegs as skakel tussen boekmense. Besonderhede van nuwe boeke word in Oondvars geplaas. Gebruik die koop by skakel om by die betrokke uitgewer of verspreider se webtuiste uit te kom.

Ek koop by Kalahari.net. Hoe kan ek deur Storiewerf aankope doen by Kalahari?

Al wat nodig is, is om 'n Kalahari.net-skakel op Storiewerf te gebruik (dit het 'n unieke nommer). Jy doen dan bloot aankope soos gewoonlik. Die stelsel registreer dat die transaksie via 'n Storiewerfskakel plaasgevind het. Storiewerf verdien 'n klein kommissie op aankope wat help om die kostes van die webwerf te dra.

Jy kan Kalahari.net skakels kry onderaan die keuselys van al die hoofbladsye. In die Oondvarsafdeling is daar by die individuele boeke die skakel "koop by kalahari.net" wat deurpoort na die spesifieke boek op Kalahari.net. Hiervandaan kan jy dan 'n soektog na enige ander produk doen.

Ek woon in die buiteland. Ek wil graag ons seuntjie (4 maande) Afrikaans leer. Kan julle asseblief vir my voorstel watter boeke ek vir hom nou al kan koop en lees.

Vir babas bly die beste boeke maar kartonboekies. Lapa Uitgewers het die Trek-die-lintreeks, Die Saamdra-reeks en Wie sÍ moe en Wie woon hier. Human het Kielie my magie en ook mos 'n reeks Saamdra-boekies. Vier maande en sewentien maande is te jonk om al te begin met konvensionele prenteboeke. Babalela se grootste aanhangers is min of meer twee en 'n half na drie jaar oud, so sekere prenteboeke sou kom werk vanaf so min of meer hierdie ouderdom. (Antwoord verskaf deur Miemie du Plessis, Lapa Uitgewers.)

Ek woon in die buiteland. Waar kan ek Afrikaanse kinderboeke bestel?

Die beste plek om by aan te klop is kalahari.net (http://www.kalahari.net). Hulle is die groot e-boekhandel in Suid-Afrika. Besoek gerus die webtuiste om te sien watter dienste gelewer word. Lapa-Uitgewers gee ook baie oulike kinderboeke uit. Kontak vir Miemie du Plessis MiemieD@atkv.org.za om uit te vind oor aflewering in die buiteland. Besoek die webtuiste by: http://www.lapa.co.za



Waar kan mens Liewe Heksie DVDís of videos koop?

Die videos is beslis beskikbaar by die SAUK se winkel in die Televisiegebou in Johannesburg. Skakel Riki by SAUK bemarking by 011 714-5603.
Pick 'n Pay hou ook van die videos aan, dus is dit dalk die moeite werd om eers daar te probeer.
Die SAUK is tans ook besig om DVD's van Liewe Heksie te laat maak, maar dis nog nie bekend wanneer dit gereed sal wees nie.
(Antwoord verskaf deur Verna Vels.)


Waar kan ek die Storieman-reeks koop?

Die Storieman omnibusse is beskikbaar by Human & Rousseau Uitgewers.



Ek het aan 'n Daan Retief kinderboekklub behoort as kind. Is daar iets soortgelyks in die mark beskikbaar?

Miemie du Plessis (Kinder- en jeugboekuitgewer LAPA Uitgewers) antwoord: Die enigste boekklubs waarvan ek weet, is die Disney- en Barbie-klubs (daar kan dalk ander ook wees) van Jacklin Enterprises.

Ons hier by LAPA het nie 'n klub nie, maar jy kan wel elke drie maande ons katalogus ontvang en dan kinderboeke via 'n posbesteldiens bestel. Daar is geen verpligtinge aan verbonde soos wat die geval is met byvoorbeeld Leserskring nie. Jy hoef nie te bestel as daar niks is waarin jy belangstel nie. Laat weet as ek jou posadres op ons lys moet plaas. miemied@atkv.org.za



Waar kan ek inligting oor skrywers kry? (Ek het heelwat inligting nodig oor die skrywer vir navorsing, 'n praatjie of 'n skooltaak.)
Die heel beste plek om inligting oor 'n Afrikaanse skrywer te kry is by NALN - die Nasionale Afrikaanse Letterkundige Museum in Bloemfontein. Hulle kan help met navrae oor letterkunde, musiek en toneel. Kontakbesonderhede: Tel: 051 405-4034. Privaatsak X20543, Bloemfontein, 9300. E-pos: naln@sac.fs.gov.za



Kan julle vir my/my kind help met redenaars? Ek het nie 'n idee hoe om 'n redenaarstema te benader nie. Is daar enige boeke te koop wat my kan help?


Storiewerf kry dikwels navrae soos hierdie, maar kan nie help om toesprake te skryf nie. 'n Baie oulike bron is die boekie "Maklikgemaakte redevoering vir elke keer sukses" deur Jovan Peters. Dit is in 1982 deur Daan Retief Uitgewers gepubliseer. Ongelukkig bestaan die uitgewers nie meer nie en ek glo ook nie die boekie in meer in boekwinkels beskikbaar nie, maar dalk kan jy by die biblioteek 'n eksemplaar raakloop.



Ek soek 'n monoloog vir 'n kunswedstryd.

Op Kollig is monoloë en samesprake beskikbaar. Gebruik gerus een van dié tekste. Stuur net 'n e-boodskap aan kollig@storiewerf.co.za met jou naam, ouderdom, die titel, en waarvoor jy dit wil gebruik. Kopiereg behoort aan die skrywer.
Hierdie is die enigste monoloë wat Storiewerf beskikbaar het. Storiewerf kan nie help met die aanbeveling van alternatiewe stukke nie.



Ek wil 'n kinderboek skryf en ook graag self die illustrasies doen. Nou wonder ek of daar spesifieke vereistes is wat uitgewers stel vir illustrasies. Is dit raadsaam om die hele boek te illustreer en dan na 'n uitgewer te gaan met teks, illustrasies en al, of is dit beter om eers net met die teks te gaan?

Miemie du Plessis van Lapa Uitgewers antwoord: Ek weet nie van ander uitgewers nie, maar ek stel eerstens belang in die teks. Slegs indien ons die teks publiseerbaar vind, sal ons 'n illustreerder opdrag gee om illustrasies te skep. Ons verkies om illustreerders van ons keuse te gebruik, aangesien ons vir die onkostes daaraan verbonde verantwoordelik is. Enigiemand is egter welkom om proef-illustrasies voor te lÍ (ook die outeur) nadat die teks vir publikasie aanvaar is.

Hoe gaan mens te werk om 'n kinderboek te laat publiseer (in Afrikaans)?

1) Jy kan jou verhaal aan enige uitgewer wat kinderboeke publiseer stuur. Geen illustrasies is nodig nie. Die uitgewer lees dan die manuskrip en besluit of hulle dit wil uitgee. Omdat die drukkoste (veral vir prenteboeke) baie duur is, keur uitgewers die manuskripte wat hulle vir publikasie oorweeg baie versigtig. (Wenk: As jy na nuwe kinderboeke kyk, kan jy sien watter uitgewers kinderboeke uitgee.)

2) Gebruik kompetisies as geleentheid om jou werk onder uitgewers se aandag te bring. 'n Kompetisie is gewoonlik groot pret en gee mens die geleentheid om jou werk teen diť van ander te meet. (Die Sanlamprys vir Jeugliteratuur word byvoorbeeld elke twee jaar deur Tafelberg Uitgewers uitgeskryf.)

3) Jy kan jou werk self laat uitgee. Daar is heelwat instansies wat hiermee kan help - jy moet net bereid wees om te betaal en self die boek te bemark.

4) As jy terugvoering kry, let goed op die keurderskommentaar. Dit behoort jou instaat te stel om jou werk te verbeter en moontlik later gepubliseer te kry. Alle sukses toegewens!

Waar kan ek van my werk heen stuur om 'n professionele opinie daaroor te hoor? Ek skryf graag Afrikaanse gedigte en lirieke en wil ook nou 'n kortverhaal probeer skryf.

Die ATKV-Skryfskool lewer nou ook diens as skryfagentskap. Jy kan jou manuskrip hierheen stuur vir kommentaar. Kontak die ATKV-Skryfskool vir meer inligting en die koste van die diens (018 299-1783).

Ek wil baie graag my verhale in 'n tydskrif laat publiseer. Kan ek dit net sommer stuur of moet ek eers toestemming vra? Moet ek die tydskrif kontak, en met wie moet ek praat?

Tydskrifte het gewoonlik 'n verhaleredakteur. Kyk by die lys van redaksielede wat by die inhoudsopgawe beskikbaar is. Dis nie nodig om eers toestemming te vra nie - stuur bloot jou verhaal met 'n kort begeleidende briefie. Hulle sal dan die verhaal keur en jou laat weet of dit geskik is vir publikasie. Onthou net om 'n afskrif van jou verhaal te hou en moet nie moed verloor as dit nie aanvaar word nie. Die meeste skrywers het 'n laai vol afgekeurde manuskripte! Slyp jou talent en een of ander tyd sal jy sukses behaal.

Ek is 'n potensiële skrywer. Waar kan ek 'n skryfkursus volg?

Daar is verskillende moontlikhede om 'n skryfkursus by die Noordwes-Universiteit te volg.

1) Skryfkuns as universiteitsvak. Skryfkuns word voltyds aangebied op die oomblik kan die vak op eerste- en tweedejaarsvlak geneem word. Nagraadse studiemoontlikhede is ook beskikbaar. Vir meer inligting oor die vak kontak Franci Greyling by franci.greyling@nwu.ac.za of (018) 299-1781.

2) Oorweeg dit ook gerus om 'n kursus by die ATKV-Skryfskool te volg. Die jaarlikse Herfsskool is baie gewild en ideaal vir mense met beperkte tyd. Kontak die ATKV-Skryfskool by 018 299-1783.

Stuur tog asb. vir my spesifikasies vir die tik van 'n manuskrip. Kantlyne, lettertipes, groottes ens. Hoeveel reëls per bladsy, hoeveel woorde. Ek is besig om vir iemand 'n manuskrip te tik vir die eerste keer en weet nie mooi hoe nie.

Basil van Rooyen gee in sy boek "How to get published in South Africa" (Southern Book Pubishers, 1994) die volgende riglyne:

  • Tik op een bladsy van A4 papier.
  • Maak voorsiening vir breë kantlyne regs en links (so 1.25 cm is gewoonlik in orde).
  • Gebruik dubbel spasiëring. 'n Bladsy wat so getik is, het gewoonlik ongeveer 300 woorde op 'n bladsy (so 10 woorde per lyn en 30 lyne).
  • (My eie ervaring: gebruik 'n maklike leesbare lettertipe, soos Times New Roman 12p. Serif lettertipes lees makliker as sans serif soos Ariel.)
  • Nommer elke bladsy (volgens Basil regs bo).
  • Die eerste lyn van 'n nuwe paragraaf word aangedui met vyf spasies.
  • Tensy daar 'n spasie in die gedrukte boek moet wees, moet spasies nie tussen paragrawe oopgelaat word nie.
  • Begin 'n nuwe hoofstuk op 'n nuwe bladsy.
  • Die bladsye moet los van mekaar ingedien word. As dit met 'n papierknip of krammetjie gebind word, maak seker dat dit maklik losgemaak kan word.
  • Stuur die oorspronklike manuskrip na die uitgewer, maar hou altyd 'n afskrif.
  • Indien jy baie twyfel, is dit die beste om maar navraag te doen by die betrokke uitgewer aan wie die manuskrip voorgelê gaan word.

Ek het 'n klompie gedigte en kort stories wat ek wil publiseer, maar ek weet nie watter stappe om te volg en wie om te kontak nie. Kan u my dalk verwitting van wat om te doen of wie om te kontak?

Uitgewers dink twee keer dink voordat hulle 'n manuskrip vir publikasie aanvaar. Moet egter nie dat dit jou heeltemal ontmoedig nie, maar kyk na verskillende opsies:

1) Daar's heelwat webwerwe wat gedigte plaas en ook 'n paar wat ruimte vir kortverhale het. Loer bietjie tussen die skakels op Storiewerf -http://www.storiewerf.co.za/grootmense/skakels.htm

2) Soek ook geleenthede om in tydskrifte te publiseer en neem aan skryfkompetisies deel. Dis goeie ervaring en op dié manier kom jou werk en jou naam dalk net onder die regte mense se aandag!

3) Stuur voorbeelde van jou werk na uitgewers en vra dat hulle dit spesifiek moet oorweeg vir versamelbundels. Maak net eers seker of 'n uitgewer wel gedigte/kortverhale publiseer. 'n Lys van uitgewers is beskikbaar op die SACBF se webwerf. http://www.sacbf.org.za/pub.html

4) Jy kan natuurlik ook jou werk self laat uitgee. Daar is heelwat instansies wat hiermee kan help - jy moet net bereid wees om te betaal en self die boek te bemark.

5) As jy terugvoering kry, let goed op die keurderskommentaar. Dit behoort jou instaat te stel om jou werk te verbeter en moontlik later gepubliseer te kry. Alle sukses toegewens!

 

 

 

 


Voordeur en inhoud | Jong woordvrate | Ouer woordvrate | e-pos

STORIEWERF word aangebied saam met woordvrate en storiemakers
van alle soorte en groottes.

Gebou en onderhou deur Franci Greyling.

Skryfkuns Skool vir Tale Noordwes-Universiteit (PUK)

(C) Franci Greyling 2000-2015