2007-09


jongklomp

gril!grot

Die robotrebel
Ida Grabe
S vir my in 'n sin: Wat is 'n robot?
'n Mensgemaakte meganiese voorwerp wat in die regte wreld kan voel, dink en optree. . . In hierdie scenario besluit die robot om iets te doen wat 'n mens sou doen as hy in dieselfde situasie was. . . Maar wat gaan jy doen?
(Daniel Wilson, skrywer van Robot Uprising).

1

"Kom, Brut0, kom saam!"
Ek is al byna by die hek voor ek omkyk om te sien of my robothond kom. Brut0 staan nog net waar ek hom neergesit het. Dis die eerste keer dat hy nie dadelik vir my luister nie.
Kan hy stukkend wees? Dalk was ek te ver van hom af toe ek gepraat het.
Ek stap terug, en praat mooi hard en duidelik:
"Kom, Brut0!"
Niks gebeur nie.
Ek druk die groen knoppie op sy neus wat hom aanskakel om te spring.
"Spring, Brut0!"
Weer niks. Die komieklike hondjie met ore soos 'n windmeul se blaaie bly roerloos staan. Hy is veronderstel om een van 100 wysies op sy ingeboude iPod te speel en op en af te spring. Maar ek hoor nie 'n geluid nie en sy geveerde wieletjies roer nie. Dis nou die toppunt van bad luck! Dis die tweede week van die skoolvakansie en ek het al my rekenaarspeletjies voos gespeel. Boonop is my beste maat, Danie, gister weg see toe, en nou is my geliefkoosde speelding gebreek!
Hy moet gebreek wees, want 'n robot kan nie ongehoorsaam wees nie. Asimof se Tweede Robotwet in I Robot sê 'n robot moet altyd 'n mens se bevele uitvoer, behalwe as hy deur te luister kan veroorsaak dat 'n mens seerkry of skade ly.
Ek sal mos niks oorkom as Brut0 agter my aankom nie! Hy moet vir my luister. Tensy. . . Ja, dis natuurlik nooit anders nie; Brut0 se batterye is pap! Toe ek en Danie gister vlieërs gebou het, het ons die musiek die heeltyd laat speel.
Ek raap die platneus op en dra hom na my kamer toe.
Nadat ek die batterye in die herlaaier gepak het, gaan maak ek vir my hot chocolate in die kombuis. Teen die yskas se deur is daar 'n briefie met 'n magneet vasgesit. Dis vir my.

Gerrit, die doughnuts op die rak is vir jou. Haarkapper toe. xxx Ma.

Ma is so vinnig uit, dat sy nie die radio afgeskakel het nie. Kurt Darren sing dawerend van sy meisie. Terwyl ek die warm melk in die beker gooi, begin die elfuurnuus.
Ek luister met die een oor terwyl ek aan die eerste doughnut smul. Dis net inflasiesyfers, 'n transitoroof in Durban en 'n bomontploffing in Bagdad. Maar die volgende nuusflits laat my my ore spits.

"Die wêreldbekende vervaardiger van bioniese en elektroniese toestelle, Biotron, stel môre hul nuwe huishoudelike robot bekend. Hierdie humanoïed is 'n meter lank en weeg 31 kilogram. Biotron wou nie te veel inligting vooraf bekend maak nie, maar volgens 'n segsman kan die meganiese huisoppasser notas neem, die huismense aan afsprake herinner en 'n pasiënt monitor."
En Pa vertel my sowaar niks nie! Ek wonder of hy saamgewerk het aan die nuwe robot? Hy is hoofbiotegnoloog by Biotron, en hy het my al vertel van die bioniese arms en bene waarvoor hy 'n kunsvel ontwerp het.
Dalk het Pa niks gesê nie omdat hy bang was ek praat by die skool oor die nuwe robot. Wat dink hy van my? Al is ek net in graad sewe, weet ek baie goed van bedryfspioenasie! Ek sal nooit iets laat uitlek wat dalk kan maak dat Biotron se kompetisie Pa-hulle se idees steel nie!
Ek gaan Pa vra of ek môre saam met hom mag werk toe gaan. Ek móét net eenvoudig by wees wanneer die nuwe 'bot vir die eerste keer deur sy passies gesit word. Ek wonder wat noem hulle hom. . . of haar.
My pa se koerant lê nog in die eetkamer waar hy hom vanoggend vinnig deurgeblaai het. Ek kry die kort beriggie op bladsy 3.

"NUWE HUMANOÏED ROL DIE MARK BINNE. 'n Robot wat spesiaal ontwerp is vir huishoudelike take soos huisoppas en monitering van siek mense word môre deur die elektronikamaatskappy Biotron bekendgestel. Die buksie van net oor 'n meter volg in die voetspore van bekende mensrobotte soos die Japannese Wakamaru en die Amerikaanse Penelope. Die robot sal volgens ons bron ook sekretariële take kan uitvoer, en staan as Fidelia bekend."

Ek maak ook nog 'n draai by my kapokkies in die tuin om die batterye genoeg tyd te gee om te laai. In die nessie in die hoek van die hok is daar nou twee eiertjies! Ek kan nie wag vir Kiepkiep se eerste kuikens om uit te broei nie.
Sy was self net 'n bolletjie dons toe ek haar gekry het. Ek het verlede maand die parmantige klein haantjie gekoop met geld van my twaalfde verjaarsdag. Ek wonder hoe hy sal voel as daar dalk een van die dae kompetisie vir hom op die werf rondskrop!
Dis tyd om te gaan kyk of die herlaaide batterye vir Brut0 weer aan die loop kry Pa het hom skaars ses maande gelede vir my present gegee, en al Biotron se Blue Tooth-produkte het 'n tweejaarwaarborg. Wat maak ek met myself die res van die vakansie as ek nie met my hond kan speel nie?

*

vervolg
* Die illustrasie is deur Yvette de Beer.
Vir navrae oor illustrasies kontak haar by exart@vodamail.co.za

 

 

 

 


Voordeur en inhoud | Jong woordvrate | Ouer woordvrate | epos


STORIEWERF word aangebied saam met woordvrate en storiemakers
van alle soorte en groottes
Gebou en onderhou deur Franci Greyling

Skryfkuns Skool vir Tale Noordwes-Universiteit (PUK)

(C) Franci Greyling 2000-2007