2004-08-01

jongklomp
kollig


 

Kollig ... monoloog
Gieliegap gil 'n G - Laerskool/kleuteroperette
Gerrit Jordaan

Operette: Laerskool of kleuterskool
Karakter:
Gieliegap, Dina Dolfyn en ander seekarakters

Gieliegap gil 'n G

TONEEL 1

(Hele verhoog is taamlik donker, UV-ligte skyn op seediere.)

(KOOR sing lied een maal deur. Daartydens kom 'n groep DOLFYNE in, gevolg deur ten minste een verteenwoordiger van elke seedier. As lied herhaal word, sing almal op die verhoog A B C D E F… en begin huil. Hulle bly moedeloos in groepies sit en leun snikkend op mekaar.)

MUSIEK: MUSIKALE ALFABET

KOOR: Ken jy die note van die musikale alfabet?
A is die eerste letter in die lange ry,
G is die laaste letter wat ons kry,
A B C D E F …
Ag wanneer kry ons tog die G!

(Sing 1 keer deur, neurie 2e keer tot voor A B C.. en begin dan huil.)

KRIEWEL: Hoor daar Knyper; die seediertjies sing ook van die musikale alfabet.
KNYPER: Ja, ek hoor. Maar hoekom dink jy huil hulle so?
KRIEWEL: Ek weet nie. Miskien ken hulle nie al die note nie. Foeitog, ek kry hulle
jammer! As ek maar net geweet het hoe die nootjies klink. Ai, ek wens ek kon note lees…

(* Kantlyn dui aan dat dialoog tegelykertyd met musiek of aksie op verhoog, plaasvind.)

(Skielik verskyn GIELIEGAP, die ruimtewese - aangerol uit die kant of sy ruimteskip kom met rukke af, vanuit die dak en land voor die grot en GIELIEGAP kom uit die bek
van die grot. Musiek speel sag terwyl dit gebeur.)

MUSIEK: GIELIEGAP WAAR GAAN JY BLY?
(slegs instrumentaal)

KNYPER: Kyk Kriewel! Daar kom 'n vreeslike snaakse mannetjie aan! O Krapkrises,
waar kom hy vandaan? Gee 'n krap tog krag!
KRIEWEL: Knyper! Moet tog nie so raas nie! Kyk eers, dalk is dit 'n gawe vriend…

(GIELIEGAP vryf sy oë en stap met sy tassie rond.)

KRIEWEL: Lyk my sy oë is nou gewoond aan die donker.
KNYPER: (Lewer kommentaar terwyl GIELIEGAP die wêreld verken. Hy vat en ruik en proe aan die diere, elkeen maak hom skrik. Telkens spring hy weg. Die diertjies beweeg agtertoe om plek te maak vir die SKULPIES se dansie.)
Die ruimtemannetjie moet nie dink hy kan hier kom rondloop onder die see en maak of die plek aan hom behoort nie!…. Daar stap hy nou by 'n dolfyn verby. O, daar sien hy hy 'n silwerelf… Gmf! Lyk my nie hy is eintlik bang vir die diere nie. Gits - amper trap hy op die bloublasie. Gmf, ek wens daardie bloublasie gee hom 'n lekker raps! Moet nie dink jy kan daardie alikreukel eet nie, sy dop sal jou tande laat kraak!

MUSIEK: SKULPIES

(Speel een maal deur terwyl SKULPIES instap. Hulle vorm sirkels, dans en aan die einde van die liedjie gaan lê hulle op hulle magies en rus op hul hande.)

(GIELIEGAP gaan sit op sy tassie en kyk na die SKULPIES wat dans as die musiek begin.)

KRIEWEL: Kyk daar, hy kyk na die skulpies. Ek wonder of die skulpies vir hom mooi is?

KOOR: Ons skulpies lê in die water en blink,
ons ruggies is hol en ons wangetjies bol.
As jy 'n skulpie se stemmetjie wil hoor
dan druk jy die skulp teen jou oor.

Luister hoe die golwe raas
luister hoe die seewind blaas.
Luister fyn die skulpie sê:
ek wil so graag op my magie lê!

(Sing liedjie eenmaal deur, herhaal dan sonder woorde - baie sag.)

(GIELIEGAP is in verwondering. Wanneer lied herhaal word pak hy sy tassie vol skulpies, wat die SKULPIES aan hom gee.)

KNYPER: (Praat as musiek sag speel na sang.) (Lag) Hy pak sy tassie vol skulpe! O, skulpies is darem mooi!

('n SKULPIE fluister iets in GIELIEGAP se oor.)

KNYPER: Wat? Ek wonder wat fluister die skulpie in sy oor. Sien jy, Kriewel, hy luister na wat die skulpie vir hom sê.

GIELIEGAP: (Vir die SKULPIE:) Ja, ek sal jou sê waar ek vandaan kom.
KRIEWEL: Het jy gehoor? Hy kan praat!

Kopiereg: Gerrit Jordaan

AAN MUSIEKONDERWYSERS

GIELIEGAP GIL 'N G is 'n nuwe operette wat vir die kleutermusiek-groep WOEPELDOEPEL (Kemptonpark) geskryf is, met die doel om die kleuters bekend te stel aan musieknotasie. Die verskillende nootname word geassosieer met seediere en elke groep sing 'n liedjie met 'n dansie. Ons wou graag die verskillende ouderdomsgroepe betrek as klas.

Die operette sou ook vir jong laerskoolleerlinge gepas wees. Die liedjies sou ook bruikbaar wees in die klasmusieksituasie.

Wat u benodig:

  1. 'n Seun (Gieliegap) en dogter (Dina Dolfyn) wat goed kan memoriseer en kan toneelspeel.
  2. Twee volwassenes wat eenvoudige handskoenpoppe hanteer (Kriewel en Knyper) en as vertellers optree (ook as "lewens"redders wanneer dit kom by die onvoorspelbaarhede van die kleingoed!)
  3. Die musiek sou net met klavier begelei kon word. Die musiek is georkestreer vir klavier, fluit, viool, tjello ('n paar sono-stafies of glockenspiel). Hierdie orkestrasie sou gebruik kon word indien u 'n klankbaan sou wou maak. (Die moeilikheidsgraad van die orkespartye is ongeveer UNISA Gr 5/6.)
  4. Groepe vir die verskillende seedierkarakters. ('n Bykomende koor sou 'n bate kon wees, anders sou die kinders na hulle item agter op die verhoog of aan die kant kon sit om die sang te versterk.)
    a) Alikreukels
    b) Bloublasies
    c) Calvynse pikkewyne
    d) Dolfyne
    e) Elwe van Sersant Silwer
    f) Fanievatte seeskilpaaie
    Daar is ook 'n paar kinders nodig om 'n Chinese slang (Die Waterslang) rond te dra. Hierdie karakter sorg vir spanning in die didaktiese sprokie.

Die dekor behels een stel met 'n onderwater seetoneel en sentrale grot waar seediere kan uitkom en waarop die handskoenpoppe sit.

Tydduur: Ongeveer 50 minute

Voorbeeld: Toneel 1

Die operette is by DALRO of by my verkrygbaar.

Gerrit Jordaan

Potchefstroom
0182933168
0727603446

Terug na Kollig

 

 

 

 


Voordeur en inhoud | Jong woordvrate | Ouer woordvrate | epos

STORIEWERF word aangebied saam met woordvrate en storiemakers
van alle soorte en groottes.

Gebou en onderhou deur Franci Greyling.

Skryfkuns Skool vir Tale Noordwes-Universiteit (PUK)

(C) Franci Greyling 2000-2012