Werfjoernaal
 
2008-02-02

werfjoernaal
argief



Kursus: Skryfkuns en Kreatiewe Denke

Die kursus word aangebied deur dr Riana Scheepers, bekende en bekroonde Afrikaanse skrywer, in die historiese opstal op De Compagnie, Wamakersvallei, Wellington.

Die kursus se doelstellings:
1. Om kursusgangers bekend te stel aan voortreflike tekste in 'n groot verskeidenheid belletristiese en joernalistieke genres,
2. om kursusgangers te lei in die kritiese beoordeling van hierdie tekste, en
3. om die skryfkuns van kursusgangers te ontwikkel en kreatiewe denke te stimuleer.

Hierdie kursus is dus nie slegs vir die literêr-begaafde persoon nie, maar vir almal wat betower word deur die wonderwêreld van woorde.

Die kursusinhoud sluit onder meer in: die lees, skryf en ontleding van poësie; kortverhale; essays; dramas vir verhoog, radio en televisie; resensies, advertensies, briewe, nuusberigte ens. Verskeie (opsionele) opdragte word tydens elke sessie gegee. Tekste van kursusgangers word onderling bespreek en beoordeel. Dit gebeur te alle tye in 'n simpatieke, maar kritiese atmosfeer.

Daar word jaarliks twee beginnerskursusse aangebied, 'n Herfskursus en 'n Lentekursus. Die Herfskursus is altyd die tweede week in Mei, die Lente-kursus is altyd die eerste week in Oktober. Die kursus duur vanaf Maandag tot Vrydag. Skrywers wat reeds die beginnerskursus voltooi het, kwalifiseer vir die Opvolgkursusse wat van tyd tot tyd aangebied word.

Koste van kursus: Prys op aanvraag. Dit sluit alle kursusmateriaal in. Daar word net van u verwag om skryfpapier en 'n pen saam te bring. Om jou plek te verseker, word 'n deposito van 50% gevra. Die deposito sal ten volle terugbetaalbaar word jy 'n maand voor die tyd kanselleer.

Vir verdere besonderhede, en om jou 'n plek te bespreek, skakel asb vir Riana Scheepers by 021 864 1241 of 082 8911 025, e pos; rianas@mweb.co.za


Die inhoud sal wees:

1. Kennismaking met verskeie voortreflike belletristiese tekste. Nie net literêre tekste nie, maar ook advertensiekopie, slagspreuke, sms-boodskappe, doodsberigte, liriek, briewe, resepte en graffiti. Ons luister ook musiek en gaan vertalings doen uit Middel-Nederlandse tekste.

2. Voltooiing van verskeie opdragte, tydens die kursus en ook langtermyn-opdragte

3. Die filosofie van kreatiwiteit - vrae soos: Wat is kreatief? Wie is kreatief? Is ek 'n skrywer of nie?

4. "Skrywersgeheime" - 'n bietjie oor die werk en die trieks van die skrywer. Bv. hoe oorkom jy skrywersdroogte (writer's block)

5. Die kwessie van kritiek - hoe gee jy dit, en belangriker : hoe hanteer jy dit?

6. Werkswinkel: bespreking van geselekteerde skryfstukke uit die klas.

7. Langtermynopdragte.

 

 

 

 


Voordeur en inhoud | Jong woordvrate | Ouer woordvrate | epos

STORIEWERF word aangebied saam met woordvrate en storiemakers
van alle soorte en groottes.
Gebou en onderhou deur Franci Greyling.

Skryfkuns Skool vir Tale Noordwes-Universiteit (PUK)

(C) Franci Greyling 2000-2008