Werfjoernaal
 
2004-03-01

werfjoernaal
argief



Wen R5000 in 'n landswye skryfwedstryd

'n VOLLE R5 000 se prysgeld kan vanjaar gewen word in 'n opwindende, landwye skryfwedstryd deur die Bloemfonteinse Skrywersvereniging gereël slegs vir volwassenes en hoërskoolleerlinge wat nog nie voorheen gepubliseer het nie.

Daar is ook vier wisseltrofeë vir skole op die spel. Wenners van geldpryse kan verder 'n Slypskool vir Ontluikende Skrywers wat die Bloemfonteinse Skrywersvereniging in Augustus aanbied, gratis bywoon.

Deelnemers moet een of meer oorspronklike opstelle, vertellings, kortverhale of kortkortverhale in Afrikaans oor voorgeskrewe onderwerpe voor Vrydag 7 Mei 2004 indien. Inskrywings word heeltemal anoniem beoordeel.

Daar is drie afdelings:

  • 'n junior afdeling (gr. 8 en 9)
  • 'n senior afdeling (gr. 10 - 12) vir hoërskoolleerlinge
  • 'n ope afdeling vir volwassenes en leerlinge.

Inskrywings in die skole-afdelings moet hoogstens 1 000 woorde lank wees en in die ope afdeling hoogstens 2 500 woorde.

In elke afdeling is daar vier pryse, plus 'n aanmoedigingsprys vir 'n deelnemer uit 'n voorheen histories benadeelde gemeenskap, of vir 'n deelnemer wie se moedertaal nie Afrikaans is nie.

Al die bekroonde inskrywings sal in Inkvars 2004, 'n huishoudelike publikasie van die Bloemfonteinse Skrywersvereniging, gepubliseer word.

Die wedstryd word deur die Vrystaatse dagblad Volksblad geborg en word met die steun van die Nasionale Afrikaanse Letterkundige Museum en Navorsingsentrum (Naln) in Bloemfontein geadministreer.

Die wedstryd word sedert 1989 landwyd aangebied en het sedertdien gegroei tot die grootste in sy soort in die land.

Inskrywing

Alle inskrywings moet van 'n voorgeskrewe inskrywingsvorm vergesel wees.

Die vorm en ook alle verdere besonderhede oor die wedstryd is op
http://www.geocities.com/bsv_skrywers/skryfwedstryd.html

Of bel Stoffel Cilliers by (051) 436 8089 (alle ure) of
Cecilia van der Linde by (051) 444 0115 (alle ure).

 

 

 

 


Voordeur en inhoud | Jong woordvrate | Ouer woordvrate | epos

STORIEWERF word aangebied saam met woordvrate en storiemakers
van alle soorte en groottes.
Gebou en onderhou deur Franci Greyling.

Skryfkuns Skool vir Tale Noordwes-Universiteit (PUK)

(C) Franci Greyling 2000-2005