Werfjoernaal
 
2006-03-20

werfjoernaal
argief



Wilde Willemientjie word losgelaat by die KKNK!

Die onweerstaanbare karaktertjie Wilde Willemientjie word te midde van groot opgewondenheid op vanjaar se KKNK bekend gestel. Riana Scheepers se eerste kinderboek, Die avonture van Wilde Willemientjie, gewaarborg om lesers van álle ouderdomme te betower, word nie verniet nie deur 'n leser beskryf as "… die heel beste ding sedert Smarties en roomys!"

Saam met die boekbekendstelling word die talentvolle Niël Rademan se musikale kinderversdrama op die planke gebring - 'n werk uit die hoogste rakke!

In hierdie uitbundige, selfs woeste, prenteboek word jonk én oud deur Riana Scheepers se rymvernuf en Vian Oelofsen se virtuose tekeninge meegesleur deur die avonture van 'n baba wat nie om dowe neute Wilde Willemientjie heet nie - sy is wild! Nie net dryf Willemien haar ouers teen die mure uit met haar kaskenades nie, maar vermorsel sommer ook 'n skurk of twee wat op haar pad kom. Saam met haar ewe onnutsige dieremaats reis hulle deur die wêreld, beleef wonderlike avonture en sorg vir 'n groot, vet makietie oral waar hulle gaan. Willemientjie is slim, waaghalsig, en baie, baie dapper. Sy is 'n wonderbaba, 'n kind wat eenhonderd persent in harmonie met die ekologie is. "Lekker wille stories … waaraan ons só 'n groot behoefte het in Afrikaans." - Linda Rode

Riana Scheepers het al verskeie literêre pryse vir haar werk ontvang. Sy is die outeur van 'n hele aantal trefferboeke, soos die Katriena-boeke, Dulle Griet (Eugène Marais-prys) en Blinde sambok (ATKV Kinderboekprys). Haar literêre werk is vertaal in Nederlands, Engels, Frans en Spaans. Die avonture van Wilde Willemientjie is haar eerste kinderboek.

Die bekroonde kunstenaar Vian Oelofsen het die illustrasies van boeke soos Net perfek deur Rachelle Greeff en Ek is Simon deur Martie Preller agter sy naam. Hy het in 2005 sy eerste kinderboek, Hou vas, Seekoei!, in Afrikaans en Engels gepubliseer.

Die avonture van Wilde Willemientjie - Musikale kinderversdrama

Regie en musiekregie: Niël Rademan
Rolverdeling: Lindi Smit, Deon van Zyl en Burnese Cronjé
Ontwerp: Jacolene de Haan

KKNK-vertonings: NGK Suidsaal R35,00 per persoon
1, 3, 4, 5 April 2006 16:00
2 April 2006 10:00

Die produksie Die avonture van Wilde Willemientjie spog met 'n sterbelaaide rolverdeling van jong, bekroonde akteurs. Dit is 'n energieke, interaktiewe opvoering gemik op kinders van alle ouderdomme.

Waarskuwing: Kinders ouer as 60 word aangeraai om voor die vertoning deeglik uit te rus. Die akteurs aanvaar geen verantwoordelikheid vir algehele uitputting nie!

Regisseur: Niël Rademan (beste M. Dram. - regisseur, 2004)
Akteurs: Lindi Smit (beste B. Dram. (hons.) - aktrise, 2003)
Deon van Zyl (Fleur du Cap - benoeming, 2003)
Burnese Cronjé
Ontwerper: Jacolene de Haan (Nederlandse skilder)

 

 

 

 


Voordeur en inhoud | Jong woordvrate | Ouer woordvrate | epos

STORIEWERF word aangebied saam met woordvrate en storiemakers
van alle soorte en groottes.
Gebou en onderhou deur Franci Greyling.

Skryfkuns Skool vir Tale Noordwes-Universiteit (PUK)

(C) Franci Greyling 2000-2006