2010-05


jongklomp

kuier by...

Christine Neser
Christien Neser is die skrywer van Kondensmelk. Marlize van der Walt het die boek baie geniet en het met Christien gesels oor boeke, skryf, stories en interessante karakters.

Waar woon jy?

Ek bly in Bryanston, Sandton.

Wat doen jy behalwe skryf?

Ek is 'n spraakterapeut wat twee dae van die week 'n pro bono praktyk by 'n laerskool bedryf. Ek werk met baie interessante kinders en sien alles van outisme tot gesplete verhemelte tot doodgewone artikulasieprobleme, soos lispel.

Wat is jou top drie gunsteling boeke?

Sjoe, dis moeilik! Ek het pas die drie boeke van Stieg Larsson gelees (The girl with the dragon tattoo, the girl who played with fire & the girl who kicked the hornet's nest) Ek kon hulle nie neersit nie! Maar ek hou ook van Marian Keyes se chick-lit boeke. Agaat van Marlene van Niekerk was onvergeetlik, 30 dae in Amsterdam van Ettienne van Heerden ook. Gewoonlik is die mees onlangse boek wat ek gelees het my beste boek!

Wou jy nog altyd 'n skrywer word of het dit maar net gebeur?

Dit het maar net gebeur! Ek hou nog altyd van stories vertel en selfs skryf, maar het nog nooit geaspireer om 'n skrywer te word nie. (I still can't quit my day job!) As kind was ek baie bang, en wou elke aand by my jonger sussie in die bed klim. Maar haar voorwaarde was dat ek vir haar 'n storie vertel. Ek het sulke vervolgverhale vertel wat oor maande geloop het! Toe ons ouer word, moes ek gereeld spookstories vertel as ons Donkerkamertjie gespeel het - gruwelike stories! Dit was altyd vir my maklik om opstelle te skryf, sodat ek baie keer vir maats ook geskryf het. As spraakterapeut skryf mens elke dag verslae en by die skole waar ek gewerk het, het ek maar altyd die skoolkonserte geskryf. Kan nie onthou hoe dit begin het nie! So het ek by 'n skryfkursus van die ATKV uitgekom en die eerste hoofstuk van 'n liefdesverhaal geskryf as huiswerkopdrag. Franci Greyling het gedink dit het moontlikhede en my aangemoedig om die storie klaar te skryf. Toe doen ek dit maar! En dit was Kondensmelk.

Hoe het jy op die idee van Kondensmelk gekom?

Ek het 'n kugel van 'n dogter, lekker bederf en vol nonsens. Sy wou nog nooit gaan kampeer nie en dis maar waar ek aan Elle gekom het. Die baie bosvakansies saam met ons eie kinders en ons vriende s'n, het maar die agtergrond geraak vir hierdie kampeerromanse.

Wat is jou passie in die lewe? Behalwe skryf nou natuurlik.

Dis maar my gesin: man, drie kinders, honde en huis. Ook al die jongmense en kinders in my lewe: die terapiekinders, sondagskoolkinders (wat party al klaar studeer het!) en die kinders van ons vriende. En dan is daar Afrikaans as taal, waaroor ek baie rooi in die gesig kan raak. Ek baklei vurig vir moedertaalonderrig en praat gedurig met jong ouers om hul kinders in Afrikaanse onderrig te hou. Laastens is daar Frans: ek leer al Frans van ek 13 is! En steeds gaan ek elke week vir 'n les! Lees dit, kyk dit, praat dit.

Wat is vir jou die lekkerste ding van skryf?

Iets grappig en waar, soos 'n skets. Ek hou ook van toesprake skryf: dis vir my lekker om 'n onderwerp te kry en dan kreatief daaroor te dink.

Toets jy enige van jou stories op iemand, soos jou kinders of iemand?

Ja, ek vra graag my oudste seun se opinie. Hy skryf ook (hy het pas as kopieskrywer by 'n advertensiemaatskappy begin werk).

Het jy enige (vreemde) gewoontes of bygelowe as jy skryf?

Glad nie. Dis boude op die stoel en skryf! 'n Groot pot tee help.

In Kondensmelk gebruik jy baie woord samestellings soos "supermegahiper" ens. Waar het jy aan die woorde gekom?

Die Franse kinders praat so. As iets cool is, is dit supermega! Hulle hou daarvan om die byvoeglike naamwoorde so aanmekaar te plak. Toe steel ek maar hulle manier van praat.

Het jy enige 'tips' vir jong, opkomende skrywers?

Ja. Gaan woon skryfkursusse by. En skryf! Mens word natuurlik baie kere teleurgestel, maar hou net aan. As jy nie dadelik jou meesterlike roman gaan skryf nie, skryf artikels vir jou jaarblad of koerant ;of selfs net briewe aan die koerant. Dit is alles kreatiewe skryf!

Wat is jou gunsteling skryf- of leesteken?

Ek dink dis die : want dit beteken… hier kom nou 'n ding!

Ek het al baie gehoor van skrywers wat wakker word met 'n storie in hulle koppe en dan begin hulle net daar aan te skryf, is dit met jou ook so, of werk jy meer sistematies?

Ek is baie onsistematies. Dis met my so: ek kry van iewers 'n idée en dan is dit maar net dit!

Baie dankie dat jy die tyd in beslag neem om die vrae te beantwoord! Dit beteken vir my baie dat ek as 18-jarige "skrywer" met so amazing skrywer soos jy kan korrespondeer...

Sjoe! Baie dankie! Ek voel ongelooflik gevlei! Jy gaan nog jou eie naam op 'n boek se rugkant lees!

Onderhoud met Marlize van der Walt. Marlize is 18 jaar oud. Haar grootste passie is boeke, skryf, lees en tale. Sy gebruik elke vrye oomblik om te skryf. Sy wil graag eendag meer mense leer van die lekker van lees, en 'n verskil maak in jongmense se lewens.

Januarie 2012

Meer oor Christien

Terug na kuier by...

 

 

 

 


Voordeur en inhoud | Jong woordvrate | Ouer woordvrate | epos

STORIEWERF word aangebied saam met woordvrate en storiemakers
van alle soorte en groottes.

Gebou en onderhou deur Franci Greyling.

Skryfkuns Skool vir Tale Noordwes-Universiteit (PUK)

(C) Franci Greyling 2000-2012