2003-06


grootmense

resensies

Dinge wat krrraakkk maak

Antoinette Nightingale

Dié prettige leesboekie is gebaseer op die musieksprokie Gedroggie-innie-gat wat die eerste keer by Laerskool Kruinsig in Kemptonpark opgevoer is. By die Aardklop-kunstefees was die produksie so gewild dat die kaartjies uitverkoop is. Dinge wat krrraakkk maak is dus die gedrukte weergawe van Gedroggie-innie-gat wat, soos dit vir my lyk, die lesers ook lag-lag sal oorrompel.

As mens hierdie boekie die eerste keer optel, voorspel die kleurryke blou en geel omslag van Willem Loots reeds pret. Met die eerste deurblaai sal enige ma weet dat die kostelike swart en wit illustrasies van Nico Meyer alleen, enige kind van ongeveer 8 tot 10 jaar veel plesier sal verskaf. Met 'n aller lieftallige monstertjie wat uit 'n yslike eier in Chantel-hulle se kelder uitbroei, 'n muur wat praat en 'n gees in 'n lampie stel die verhaal ook nie teleur nie.

Die Gedroggie-baba met sy sagte "kermgeluidjies" en "tone soos frikkadelletjies" (p 15) sal lesers se harte laat vermurwe, maar as hy ewe liefies glimlag en 'n muis in sy mond druk, weet ek dat te minste sommige lesers lekker sal gril. As Gedroggie uit die kelder ontsnap, dreig om Strepies, die kat op te eet en al hoe groter en groter word, sal die meeste lesers benoud begin raak.

Muur, wat naas Chantel en Gedroggie een van die hoofkarakters in die storie is, was oorspronklik 'n slaaf wat in die Kaap van drie honderd jaar gelede deur 'n "djienie" in die muur in getoor is. Sy vindingrykheid, droë humor en pittige Kaapse Afrikaans, maak hom ewe eens 'n oortuigende karakter wat lesers positief sal beleef.

Die gebeure word duidelik uit die kinderkarakter, Chantel, se perspektief vertel en die heerlike natuurlike en gemaklike dialoog is 'n pluspunt in hierdie boek wat deur drama-onderwysers met vrug en vreugde gebruik sal kan word.

Die verhaal speel af op Kaapse wynplaas, Muratie, met 'n lang geskiedenis waarop die outeur self gaan navorsing doen het.

Dinge wat krrraakkk maak is geskik as 'n voorlees- of selfleesboek.

Lapa uitgewers. ISBN 0 7993 2928 2.

Maritha Snyman

Prof. Maritha Snyman is verbonde aan die Departement Inligtingkunde, UP.
Terug na Resensies

 

 

 

 


Voordeur en inhoud | Jong woordvrate | Ouer woordvrate | epos

STORIEWERF word aangebied saam met woordvrate en storiemakers
van alle soorte en groottes.
Gebou en onderhou deur Franci Greyling.

Skryfkuns Skool vir Tale Noordwes-Universiteit (PUK)

(C) Franci Greyling 2000-2005