2004-08


grootmense

resensies

Erik en die Kido-dinges

Leon de Villiers

Erik en die Kido-dinges is nog 'n publikasie van die bekroonde Afrikaanse kinder-en jeugboekouteur, Leon de Villiers. Met hierdie prettige boek gerig op lesers van 8 tot 12 jaar bewys De Villiers hom weer eens as een van die veelsydigste kinder-en jeugboekouteurs vandag.

Erik is die hoofkarakter uit wie se perspektief die leser bewus word van sy toenemende ontevredenheid met sy iiriterende gesinsopset. Niemand verstaan hom nie en niemand luister na hom nie. Gou kom die leser agter dat dié ontevredenheid wedersyds is. Einde ten laaste neem Erik se ouers hom, tot die verligting van albei partye, na die kido-teek waar mense kinders soos boeke kan inruil en uitneem.

Dié tema van ouers en kinders wat ontevrede is met mekaar word meermale in die kinderliteratuur aangetref. Anders as Valérie Dayre se donker en ontstellende hantering van dié tema in haar Ik ruik kindervlees, skep De Villiers 'n humoristiese verhaal waarin hy die spot dryf met verskeie stereotipes in die ouer-kindverhouding en waar beide ouers en kind tot nuwe insigte kom.

Erik se karakter is oortuigend. Van sy ontevredenheid oor hy die honde-poef moet optel tot by sy waaghalsige ontsnapping by die De Kommers tree hy op en reageer hy soos wat mens van 'n seun van sy ouderdom sal verwag. Menige gesin sal hulleself in die uitbeelding van Erik en sy gesin herken.

Dié boek wat kinders (en ouers) lekker sal laat lag, word sterk aanbeveel vir lesers (en veral seuns) vanaf agt jaar.

LAPA uitgewers. ISBN 0 7993 3165 1.

Maritha Snyman

Prof. Maritha Snyman is verbonde aan die Departement Inligtingkunde, UP.
Terug na Resensies

 

 

 

 


Voordeur en inhoud | Jong woordvrate | Ouer woordvrate | epos

STORIEWERF word aangebied saam met woordvrate en storiemakers
van alle soorte en groottes.
Gebou en onderhou deur Franci Greyling.

Skryfkuns Skool vir Tale Noordwes-Universiteit (PUK)

(C) Franci Greyling 2000-2005