2006-11


grootmense

resensies

Die avonture van Magrietjie Swaaiboude

Marianna Brandt

Die avonture van Magrietjie Swaaiboude is 'n boek wat beslis die moeite werd is om op die boekrakke van kinders van vier tot tagtig te hê. Avontuurlik, prettig en kreatief - 'n inspirerende verhaal wat op die waarheid gebaseer is.

Wie is Magrietjie Swaaiboude? Sy hou daarvan om haarself mooi te maak. Sy hou van aandag. Sy hou van kos - baie! Ja, sy is 'n vrou . . . maar nie sommer enige vrou nie! Magrietjie Swaaiboude is die bekendste meisie in George. Sy mag miskien 'n Labrador wees, maar in haar hart is sy 'n mens. Nadat sy 'n paar jaar gelede 'n nasionale kompetisie vir die oulikste hond in die land gewen het, aangebied deur Kwêla op KykNet en Animal Talk, het sy feitlik 'n celebrity geword in haar tuisdorp. Saam met Samuel en Blondie, haar kokketielvriende, en haar baas, Phillip Kotze, werk sy elke dag hard in die gemeenskap van George. Sy dra blomme aan vir siek mense, oorhandig diplomas aan kleuters en poseer vir foto's. Daar is darem ook genoeg pret en avontuur - 'n fliek, verjaardagpartytjie, plaasvakansie en treinrit . . . en moenie vergeet van al die kere wat Magrietjie al vir Samuel of Blondie moes red nie!

Marianna Brandt slaag in Die avonture van Magrietjie Swaaiboude baie goed daarin om feite en fiksie op kreatiewe en oorspronklike manier te vermeng. Die storielyn van die verhaal is interessant, en die jonger leser sal voortdurend wonder wat volgende met die karakters gaan gebeur. Veral die dierekarakters word dan ook sterk en gevat uitgebeeld. Die humor en deernis waarmee die teks geskryf is, maak dit verder ook 'n genot om te lees. Skryfmatig is daar wel soms hinderlikhede in die teks, soos lomp sinskonstruksies en foutiewe leestekengebruik. Dat dit egter 'n kreatiewe en vars teks is, is nie te betwyfel nie. Tanja Joubert se illustrasies dra ook by tot die pret en genot van die leeservaring. Die avonture van Magrietjie Swaaiboude is 'n boek wat geniet sal word deur diereliefhebbers en enigeen wat jonk van gees is.

Illustrasies Tanja Joubert

Human & Rosseau, Sagteband, Prys: R89.95, ISBN: 0 7981 4499 8


Anneretha Combrink

Anneretha Combrink is 'n nagraadse student in Skryfkuns aan die Noordwes-Universiteit.
Terug na Resensies

 

 

 

 


Voordeur en inhoud | Jong woordvrate | Ouer woordvrate | epos

STORIEWERF word aangebied saam met woordvrate en storiemakers
van alle soorte en groottes.

Gebou en onderhou deur Franci Greyling.

Skryfkuns Skool vir Tale Noordwes-Universiteit (PUK)

(C) Franci Greyling 2000-2010