2006-03-01


grootmense

resensies

Die masker van Yoruba

Marie Reynecke

Die masker van Yoruba is Marie Reyneke se derde avontuurverhaal vir ouer kinderlesers. Theuns-hulle was ryk en gelukkig en hy was kaptein van die skool se onderwaterhokkiespan. Maar Theuns se lewe verander onherroeplik toe hy saam met sy ma en suster as arm onbekendes op Sandbaai in 'n klein strandhuisie moet gaan bly. Die intrige draai kortliks om hoe Theuns by die nuwe omstandighede moet aanpas en sy menseverhoudings met sy huismense en die nuwe vriende én vyande wat hy op Sandbaai maak asook sy betrokkenheid by perlemoenstropery.

Die situering van die roman bied aan die leser 'n ingeligte blik op die wêreld van diepseeduik en die smokkelhandel met perlemoen. Die fokus val veral op Theuns se verhoudings met sy ma, sy sussie, Ras Payne en Jessie, die meisie bos wilde hare. Maar dis rondom sy verhouding met sy pa wat fisies afwesig is wat Theuns met homself en sy lewenswaardes gekonfronteer word. Die masker van Yoruba word die simbool van die lewenskwessies waarmee Theuns spook: die materialisme en die keuse tussen reg en verkeerd. Dit is jammer dat die roman weer van 'n beperkte omvang is. Dit laat die indruk van oppervlakkigheid. Daar is genoeg potensiaal in die intrige, karakters (Suwwe Soois) en menseverhoudings vir 'n meer volledige ontginning. Daar ís kinders wat dikker boeke wil lees!

Die masker van Yoruba is nietemin 'n welkome toevoeging tot die klein variasie Afrikaans verhale vir ouer kinders. Dit bied meer as net 'n spannende avontuurverhaal. Dit ontgin die kompleksiteit van mense en menseverhoudings en verbeeld die noodsaaklikheid om keuses te maak.

Die masker van Yoruba. Marie Reynecke. Human&Rousseau. R59.95. ISBN 079814420

Maritha Snyman

Prof. Maritha Snyman is verbonde aan die Departement Inligtingkunde, UP.
Terug na Resensies

 

 

 

 


Voordeur en inhoud | Jong woordvrate | Ouer woordvrate | epos

STORIEWERF word aangebied saam met woordvrate en storiemakers
van alle soorte en groottes.
Gebou en onderhou deur Franci Greyling.

Skryfkuns Skool vir Tale Noordwes-Universiteit (PUK)

(C) Franci Greyling 2000-2006