2006-03-01


grootmense

resensies

Operasie M.I.A.A.U.Titel

Carina Diedericks-Hugo

Carina Diedericks-Hugo is geliefd om haar opwindende thomas@- reeks. Met Operasie M.I.A.A.U. gaan haar bewonderaarsklub uitbrei na jonger lesers van 8 - 10.

Felix, is 'n doodgewone elfjarige wat van rugby hou, maar nie van Wiskunde, meisies en groente nie. En toe eendag verander sy lewe heeltemal. Hy word, teen sy sin, ingetrek in 'n baie eienaardige, geheime organisasie, MIAAU, wat " bullebakke met bose magte vastrek" (p6). Die "mense" wat hierdie organisasie bedryf, is katte - katte wat Felix baie goed ken. Hy vind uit dat katte neersien op mense. Hulle verwerdig hulle om met hom te praat net omdat hy hulle kan help om 'n bose plan, wat mensekinders (en katte) se lewens onnoemlik onplesierig sal maak, te fnuik.

Dis 'n prettige en oorspronklike verhaal met 'n lekker sterk spanningslyn. Soos die karakters in die thomas@- reeks is Felix 'n besonder oortuigende karakter wat mens op enige laerskool se skoolterrein kan raakloop. Diedericks-Hugo het inderdaad die vermoë om in haar karakters se koppe in te klim. Die katkarakters is herkenbare tipes: die streng Meneer Haasbroek, die naïewe Jannie, die bose Meneer Rippenaar...

Humor is 'n besonder belangrike bestanddeel Operasie M.I.A.A.U.. Die intrige is 'n spottende variasie van die klassieke spioenasieverhaal en Felix die ietwat onwillige spesiale agent. Daar word gespot met mense wat in die boek katte is én mense wat in die boek mense bly, maar wat ons almal uit feit en fiksie leer ken het. Dit sluit aan by die tong-in-die-kies spioenasiestrokiesverhaal, Agent Snoet, van Francois Bloemhof. Diedericks-Hugo se taalgebruik en beeldspraak is sprankelend vars en snaaks. Vergelyk: "hy dink hy nies goud", "monsternollies en "sy kruip soos 'n stofsuier" (voor haar pa-hulle!).

Die boek is in volkleur met komplementerende sketse van Séan Verster. Veral seuns (maar ook dogters) en alle katliefhebbers sal Operasie M.I.A.A.U. terdeë geniet.

Operasie M.I.A.A.U. Carina Diederiks-Hugo. Human & Rousseau. R 69.95 ISBN 0798144904

Maritha Snyman

Prof. Maritha Snyman is verbonde aan die Departement Inligtingkunde, UP.
Terug na Resensies

 

 

 

 


Voordeur en inhoud | Jong woordvrate | Ouer woordvrate | epos

STORIEWERF word aangebied saam met woordvrate en storiemakers
van alle soorte en groottes.
Gebou en onderhou deur Franci Greyling.

Skryfkuns Skool vir Tale Noordwes-Universiteit (PUK)

(C) Franci Greyling 2000-2006