2006-06


grootmense

resensies

Ouens is nie pizzas nie

Tania Brink

Ouens is nie pizzas nie is die tweede boek uit die pen van die gewilde Tania Brink. Met Liefde laat jou rice krispies anders proe het sy haarself bewys as funky nuwe skryfster, iemand wat die harte van meisies (en ouens) verstaan. Ouens is nie pizzas nie is vars uit die oond en sal geniet word deur enige iemand wat hou van rissies (of rissiepitte!), genoeg aksie en intrige en natuurlik vuurwarm romanse.

Anja en Zanelle werk vir die Desembervakansie in Dolfynbaai se enigste pizzarestaurant. Soos altyd, is Zanelle vol slim idees oor ouens. Sy kry meeste van dié idees uit tydskrifartikels, soos die een wat meen ouens is soos pizzas. Anja dink dis sommer strooi - tot hulle die twee aantreklike broers Markus en Abrie ontmoet. Die een is 'n blonde branderplankryer en die ander 'n donkerkop-diepseun - en Zanelle se tergery dat altwee op Anja verlief is, staan haar glad nie aan nie. Net toe sy tog begin dink die twee broers is dalk nie te onaardig nie, gebeur daar iets wat die twee ouens diep in die deeg laat vassit. Anja en Zanelle is op die oorlogspad en dit lyk of die twee ouens met meer as net brandbekke vir hulle skuld gaan moet betaal.

Ouens is nie pizzas nie is 'n storie wat jou dalk gaan laat lus word vir Hawaiian, Margarita, of Meksikaanse pizza met ekstra chilli-sous! Dis 'n boek geskryf in alledaagse jongmenstaal oor dinge waarmee elke meisie en ou kan identifiseer - soos pizza en romanse.

Lapa Uitgewers, Sagteband, 0-7993-3632-7

Anneretha Combrink

Anneretha Combrink is 'n nagraadse student in Skryfkuns aan die Noordwes-Universiteit.
Terug na Resensies

 

 

 

 


Voordeur en inhoud | Jong woordvrate | Ouer woordvrate | epos

STORIEWERF word aangebied saam met woordvrate en storiemakers
van alle soorte en groottes.
Gebou en onderhou deur Franci Greyling.

Skryfkuns Skool vir Tale Noordwes-Universiteit (PUK)

(C) Franci Greyling 2000-2006