2006-03-01


grootmense

resensies

Pretpark

Jaco Jacobs

Die baie belowende jong skrywer, Jaco Jacobs, se nuwe boek Pretpark is die derde boek in Human en Rousseau se avontuurreeks en is, soos ons al van Jacobs gewoond is, 'n baie oorspronkilike verhaal.

Johan en sy beste vriend Anton bly in die dorpie Rustenvrede. Die klem val op rus en vrede. Daar heers groot opgewondenheid onder die inwoners van die dorpie toe 'n rondreisende pretpark daar aankom. Alhoewel Johan en Anton aanvanklik skepties is oor die hele gedoente, neem hulle later vrywillig deel aan 'n toertjie by die skool om die pretpark te adverteer. Eienaardige goed gebeur daarna met Johan en Anton wat moontlik nie aan blote toeval toegeskryf kan word nie. Die karaktertekening is, soos in Jacobs se vorige boeke, oortuigend. Veral manlike lesers van graad vyf tot sewe sal lekker met die twee karakters kan identifiseer.

Jacobs sorg vir 'n vinnige leestempo in Pretpark. Niks is uitgerek of langdradig nie. Die die leser word half onwillekerig saamgesleep na 'n fantasiewêreld van waarsegters, olifantritte en die ongelooflike ril-en-gil-koets.

Die onskuldige aanvang van die verhaal versterk die oplopende spanning wat veroorsaak dat mens nie die boek kan neersit voordat jy uitgevind het wat regtig aan die gang is nie.

Hoewel die raaisel eers aan die heel einde ontknoop mag die skerpsinnige leser dalk in die middel van die boek die ontknoping begin vermoed. Dit sal niemand egter verhinder om die boek enduit deur te lees nie.

'n Lekker boek vir die kerskous as dit dalk reën by die see.

Marí Visagie (Student in Uitgewerswese aan die Departement Inligtingkunde, Universiteit van Pretoria)
Terug na Resensies

 

 

 

 


Voordeur en inhoud | Jong woordvrate | Ouer woordvrate | epos

STORIEWERF word aangebied saam met woordvrate en storiemakers
van alle soorte en groottes.
Gebou en onderhou deur Franci Greyling.

Skryfkuns Skool vir Tale Noordwes-Universiteit (PUK)

(C) Franci Greyling 2000-2006