2003-04


grootmense

resensies

Liefde laat jou Rice Krispies anders proe

Tania Brink

Simone de Beauvior het gesê: "The word 'love' has by no means the same sense for both sexes, and this is one of the serious misunderstandings that divide them." Dit is seker om hierdie rede wat de Beauvior uitlig, dat ons altyd nuwe liefdesverhale sal kry, want misverstande, veral dié wat rondom die liefde draai, skep 'n mynveld van potensiële temas vir skrywers. Dit gesê, bly dit steeds skaars om 'n liefdesverhaal raak te lees wat nie 'n uiteensetting gee van geykte karakters, deurtrapte liggings of holruggeryde tema's nie. En as 'n mens aan tieners en die liefde dink, spook soetsappige boeke soos die Sweet Valley High-reeks, Soekie word Sestien en Somernagdroom by my.

Maar dan is daar Liefde laat jou Rice Krispies anders proe.

"Shakespeare was miskien hierdie hengse romantiese skrywer, maar hy was 'n seksis, nes die meeste mans. Hy't seker heeldag op sy agterent gesit en skryf terwyl 'n vrou vir hom kos maak, sy klere was en sy vuil sokkies agter hom opgetel het."

Liefde laat jou Rice Krispies anders proe deur die jong Bloemfonteinse skrywer, Tania Brink, is 'n tipiese, skoolliefdesverhaal… met 'n verskil. Marzanne Odendal is 'n uitgesproke tiener: sy dink Shakespeare is pateties, die skoolheld, Armand is verwaand, om verlief te raak is malligheid en tydmors en die enigste werk waaroor 'n mens kan opgewonde raak is die joernalistiek. Haar vriendin, Nadia, glo presies die teenoorgestelde en wag in spanning dat die spreekwoordelike ridder haar na die Mei-dans sal vra. Die dans-atmosfeer is een van uiterste frustrasie vir Marzanne, veral toe anonieme liefdesgedigte per e-pos vir haar gestuur word. Sy vermoed natuurlik dadelik die stillerige Wikus, maar dan blyk dit 'n geweldige misverstand te wees.

Hierdie is 'n boek wat jou reeds van die pragtige omslag en verbeeldingryke titel (grammatikale fout, ten spyt) af boei. Dit is 'n alternatiewe tienerliefdesverhaal, in dieselfde tradisie as Human & Rousseau se Eerste Liefde-reeks. Liefde laat jou Rice Krispies anders proe is intelligent geskryf, die karakters blyk met die eerste oogopslag stereotipies te wees, maar hou aan om die leser te verras met diepte, humor en die natuurlike tiener-wroegings. Dit is 'n lekkerleesboek, toeganklik vir meisies én seuns, en perfek vir die lang somerdae wat wag.

Liefde laat jou Rice Krispies anders proe.
Tania Brink
LAPA Uitgewers

Carina Diedericks-Hugo

Terug na Resensies

 

 

 

 


Voordeur en inhoud | Jong woordvrate | Ouer woordvrate | epos

STORIEWERF word aangebied saam met woordvrate en storiemakers
van alle soorte en groottes.
Gebou en onderhou deur Franci Greyling.

Skryfkuns Skool vir Tale Noordwes-Universiteit (PUK)

(C) Franci Greyling 2000-2005