April 2007


grootmense

resensies

Saartjie

Bettie Naudé

Die Saartjie wat ons ken het 'n splinternuwe baadjie aan, reg om 'n nuwe generasie met haar kattekwaad en streke te vermaak!

Die sypaadjie voor die Baumanns se groot dubbelverdiepinghuis is met betonblokke geplavei. Wanneer Saartjie daar kom, spring sy van die een blok na die ander. Dit is by haar 'n saak van eer om nie op die gleuwe te trap nie.

Sy spring nou vinnig van die een blok na die ander. Wanneer sy amper by die hekkie is, vries sy in haar spore. Met 'n teleurgestelde uitdrukking op haar gesig kyk sy na haar een voet. Die skoen se punt raak aan een van die groewe tussen die twee blokke...

In die eerste boek, Saartjie, het die Drie Muskiete, Saartjie Baumann en haar twee vriendinne, Anna en Lina, eindelose pret saam met die kinders van Lynnekom. Saartjie reël 'n konsert ten bate van minderbevoorregte kinders en al haar vriende is verplig om deel te neem. Met Saartjie is daar altyd iets aan die gebeur en die boek sorg vir hope pret en lag, met 'n bietjie spanning ook!

Dan kom die tweede boek in die reeks, Saartjie se vakansie. Dit is 'n heerlike lang vakansie, maar dit reën. Omdat daar niks anders is om te doen nie hou die kinders 'n moddergeveg, seuns teen meisies... selfs die dominee het sy beurt gekry! 'n Reeks gebeure lei tot die perfekte geleentheid om vir Muggie, Anna se klein sussie, in 'n nar te omskep met helder verf. Saartjie sien al hoe hulle geld maak as hulle haar toertjies leer, maar Muggie se ma dink nie so nie... Alles in die vakansie is egter nie lag en pret nie, 'n orkaan tref 'n arm woonbuurt en Saartjie eindig met 'n tweeling wat die ramp oorleef het. Sy versteek hulle in haar ou speelkamer terwyl die hele land na die vermiste tweeling en hul ontvoerder opsoek is!

Die reeks bestaan uit 24 boeke, alles dieselfde as die vorige Saartjie-reeks, en tog splinternuut. Die verhale verloop dieselfde, met enkele woord en frase veranderings sodat die nuwe generasie Saartjie-lesers met Saartjie en haar maats kan assosieer. Die buiteblad is ook verrassend nuut en vars, dit maak mens sommer lus om weer kind te word en Saartjie opnuut te ontdek en geniet. Saartjie het dus nog lank nie die laaste weerbarstige krul van haar voorkop af weggevee nie... Die Saartjie...Ai, dié Saartjie!

Elize Potgieter

Elize Potgieter is 'n student in Skryfkuns aan die Noordwes-Universteit.
Terug na Resensies

 

 

 

 


Voordeur en inhoud | Jong woordvrate | Ouer woordvrate | epos

STORIEWERF word aangebied saam met woordvrate en storiemakers
van alle soorte en groottes.
Gebou en onderhou deur Franci Greyling.

Skryfkuns Skool vir Tale Noordwes-Universiteit (PUK)

(C) Franci Greyling 2000-2007