2003-04


grootmense

resensies

Die Stoutsterte van Texel tot Tafelbaai

Marianna Brandt

Verlede jaar het die polities inkorrekte 350 jarige viering van Jan van Riebeeck se landing aan die Kaap feitlik ongesiens verbygegaan. Danksy Dan Sleigh se allemintige Eilande en ook Marianna Brandt se Die Stoutsterte van Texel tot Tafelbaai is daar immers op die literêre front lewe geblaas in die geskiedenis van die VOC aan die Kaap.

Die Stoutsterte van Texel tot Tafelbaai vertel die verhaal van vier muise: Pieta en Leentjie van Sterten en Koot Kaas met sy verwagtende Ellie, wat op die vooraand van Van Riebeeck se vertrek na die Kaap besluit om saam te gaan na die "nuwe land".

Die skip is 'n uiters muis-onvriendelike omgewing met hongerige skeepskatte, 'n venynige papegaai, wrede matrose en vreesaanjaende seerowerrotte. Bowendien word die familie Kaas se sesling gebore wat kort voor lank 'n besonderse aanleg vir moeilikheid toon. En dan is daar nog die lywige Pieta wat amper daagliks net-net aan Gemmerkat se kake en die bakker se skoen ontsnap.

Dit is 'n verhaal wat die geskiedkunige gegewens rondom Van Riebeeck en die verversingspos uitstekend en innoverend uitbeeld. Vanuit die perspektiewe van die muise word die detail op die skip, asook die besonderhede rondom die missie, fyn waargeneem. Dit is veral Tanja Joubert se verbeeldingryke illustrasies wat die teks verryk en die historiese gegewens lewe gee.

Alhoewel die muise allerhande gevare in die gesig staar en avonture beleef, bestaan die paradoksale probleem dat die verhaal nie baie opwindend is nie. Interessante karakters soos die seerowerrot, Vasco Slimrot, kon dalk 'n meer prominente rol gespeel het om die spanningslyn uit te bou.

Nietemin, kan beide die uitgewer en die skrywer tevrede voel met 'n boek wat enersyds 'n vars persepktief op 'n ou gegewe bied en andersyds nog 'n lekker storie aan jong lesers verskaf.

Marianna Brandt en Tanja Joubert (illustrasies)
Human & Rousseau, 2002

Carina Diedericks-Hugo

Terug na Resensies

 

 

 

 


Voordeur en inhoud | Jong woordvrate | Ouer woordvrate | epos

STORIEWERF word aangebied saam met woordvrate en storiemakers
van alle soorte en groottes.
Gebou en onderhou deur Franci Greyling.

Skryfkuns Skool vir Tale Noordwes-Universiteit (PUK)

(C) Franci Greyling 2000-2005