2006-03-01


grootmense

resensies

Vuvuzela

Engela van Rooyen

Hoewel 'n wenner in die Sanlam-prys vir jeuglektuur vanjaar, het Engela van Rooyen se voortreflike township-storie Vuvuzela nie die aandag ontvang wat dit verdien nie. Hier is 'n waardige wenner en met die intrap 'n pleidooi dat hierdie boek 'n móét is om te lees. Die rede is nie net die vooraanliggende township-tema nie, maar die wonderlike wyse waarop die skrywer die seuntjie, Senke, sy wêreld voorstel en verken. Jy lees agter die bekoorlike, plek-plek hartroerende verhaal aan. Jy weet dis meer as net 'n storie, dis 'n verkenning van die psige van 'n kind en sy sin maak van 'n wêreld waarin volwassenes dikwels faal om betekenis aan te kan gee.

Vuvuzela is die deernisvolle verhaal van die 12-jarige Senke wat in 'n plakkerskamp woon en wat vir sy bestaan moet baklei. Hy woon saam met sy grootbroer. Hulle is albei weeskinders. Buti staan voor Senke, Buti vat al die slae en hy sorg dat Senke kos en klere het en dat hy skool loop om Grade Twelve te kry.

Daarom wil Senke 'n groot ding vir Buti doen om dankie te sê. Hy het 'n geheime plan wat gekoppel is aan die World Soccer Cup wat in 2010 na Suid-Afrika kom. Vir Senke se plan is daar ongelukkig geld nodig. Intussen stap die tyd aan en 2010 kom nader. "Die verlede is sterk," het Mama gesê toe sy nog gelewe het. Sy het gesê jy moet wag vir die krag van die verlede om te werk. Maar nou het daar gister 'n slegte ding by die skool gebeur. Beteken dit dat vandag ook sleg sal wees? En wat van môre? Die verhaal van Buti se sorg, die hartklop van liefde wat in daardie sorgsaamheid te hoor is, is een van die ontroerendste verhale wat nog in 'n jeugboek vertel is.

Van Rooyen het reeds met 'n vorige jeugboek wat in die township gesitueer was, gewys dat sy die wêreld goed waargeneem en nagevors het. Haar taalvaardigheid laat Afrikaans in die milieu kleurryk leef. Haar insig in die gemoed en verwagtinge van 'n kind, laat 'n onvergeetlike indruk.

Voorskriftelik wil ek hoegenaamd nie klink nie, maar hier is iets vir die skolemark en behoort in duisende aangekoop te word. Intussen is dit 'n ideale kersgeskenk en 'n móét vir elke kind se huisbiblioteek.

Engela van Rooyen het die Sanlam Silwer 2005 vir Vuvuzela gewen. Dit word deur Tafelberg uitgegee.

Amanda Botha

Amanda Botha resenseer boeke vir Kaapse radiostasie, FMR in die program Boekekeuse.
Terug na Resensies

 

 

 

 


Voordeur en inhoud | Jong woordvrate | Ouer woordvrate | epos

STORIEWERF word aangebied saam met woordvrate en storiemakers
van alle soorte en groottes.
Gebou en onderhou deur Franci Greyling.

Skryfkuns Skool vir Tale Noordwes-Universiteit (PUK)

(C) Franci Greyling 2000-2006