2006-12


grootmense

resensies

Zanzibaarstraat

Niki Daly
Niki Daly stel weereens sy besondere talente ten toon met Mamma Jumbo, die vriendelike olifant, se huisbouery en die kuikentjie, Klein Tjiep, se aanneming in nommer 7-Up Zanzibarstraat. Kleurryke illustrasies komplimenteer die storie en maak die karakters lewendig en geliefd. Die illustrasies is van so 'n aard dat 'n kleuter wat die storie gehoor het, vir 'n lang ruk daarna nog deur die prentjies geprikkel en geamuseer kan word.

Zanzibarstraat is 'n eenvoudige verhaal ingedeel in vyf hoofstukke, elk met 'n nuwe insident maar deel van die geheel waarmee elke kleuter kan identifiseer. Mamma Jumbo is 'n deernisvolle karakter met alledaagse behoeftes soos om 'n huis van haar eie te hê en iemand om haar lewe mee te deel sodat sy nie alleen is nie. Die storie vertel hoe Mamma Jumbo huisbou, hoe haar vele dierevriende haar help en hoe sy en Klein Tjiep saambly. Klein Tjiep is die karakter waarmee elke kind sal kan identifiseer.

Die verhaal is ryk aan alledaagse gebeurtenisse soos bad, kinders wat wegraak, verjaardagpartytjies en skadus teen die muur. Alhoewel die storie in eenvoudige taal geskryf is, is dit ook deurspek met meer gevorderde woorde en frases wat die kleuter geleentheid bied om deur middel van identifisering met bekende situasies die betekenis van nuwe woorde self af te lei.

Zanzibarstraat is 'n prettige verhaal meesterlik geïllustreer. Daly kry dit reg om die hartlikheid wat gepaard gaan met goeie buurskap en die sekuriteit wat liefdevolle verhoudings bied, in 'n interessante diereverhaal te demonstreer.

Zanzibarstraat is 'n kleuterboek waar nie een woord of 'n stukkie papier gemors is nie. Selfs sonder die woorde is die boek se voorkoms alleen 'n kleutermoet!

Lapa Uitgewers.
ISBN 0 7993 3506 1

Marionne Minnaar

Marionne Minnaar is 'n student in Skryfkuns aan die Noordwes-Universteit.
Terug na Resensies

 

 

 

 


Voordeur en inhoud | Jong woordvrate | Ouer woordvrate | epos

STORIEWERF word aangebied saam met woordvrate en storiemakers
van alle soorte en groottes.
Gebou en onderhou deur Franci Greyling.

Skryfkuns Skool vir Tale Noordwes-Universiteit (PUK)

(C) Franci Greyling 2000-2006