2001-03-16

werfjoernaal

werkplaas

 

2. Om 'n suksesvolle skrywer te wees...

Om 'n suksesvolle skrywer te wees is nie maklik nie, maar om die hoogste sport van skryf te bereik gaan baie vra. Partymaal gaan jy voel dit vra die onmoontlike. Aanhouer wen!

Jy mag dit oorweeg dat jy miskien nie bereid is vir die gekompliseerde lewe van 'n skrywer nie. Probeer, anders sal jy nooit werklik weet of jy bereid is vir die harde werk en opoffering wat ten einde die wonderlike gevoel van welgewonne geslaagdheid meebring nie!

Jy het liefde vir taal. Klein bietjie verbeelding? Sien in jou diepste gedagtegang die kleinste besonderhede van verbeeldingsvlugte - jou verhaal in wording… Al wat jy nou nog moet doen is om die geskrewe word en die beelde wat jy so duidelik sien op papier bymekaar te bring! Dit is die wonderlikste kombinasie, en só is menige treffer al gebore.

Ongeag wat die kategorie waarin die boek moet val wat jy beplan om te skryf, óf die artikel wat jy in gedagte het, is daar twee baie belangrike aspekte wat ten alle tye onthou moet word.

Ten eerste - wat ook al die onderwerp waaroor jy skryf - moet aandag aan die fynste besonderhede gegee word. Selfs al konsentreer jy op kinderboeke. Hierdie skryfstyl is nie minderwaardig teenoor boeke wat geskryf word vir grootmense nie.

Ten tweede, jy moet ten alle tye onthou dat watter skryfstyl jy ook al aanneem, gaan die woorde wat jy op papier neerpen, een of ander effek op die leser hê. Ten goede, of ten kwade. Daar is geen sterker wapen as die geskrewe woord nie. Die skrywer dra verantwoordelikheid vir elke woord wat hy/sy neerpen. Die leser, jonk en oud, verdien net die beste in onderwerp, styl en tegniek. Maak nie saak vir watter ouderdomsgroep jy skryf nie.

Werksopdrag

Dink aan drie boeke wat 'n groot indruk op jou gemaak het. Selfs al is dit boeke vanuit jou kinderdae. Lees hulle weer en identifiseer wat presies elkeen bevat wat dit vir jou so uitsonderlik maak dat jy hierdie boeke ná al die tyd nog onthou.

Skenk aandag aan die "stem" van die woorde, die styl, intriges en komplot-beplanning van elkeen. Wat het hierdie drie boeke met mekaar in gemeen? Wat is die verskille tussen hierdie drie boeke? (Buiten die komplot en skrywers.)

Besoek die biblioteek en bestudeer verskillende fiksie en nie-fiksie tydskrifte. Bestudeer hierdie afdeling baie goed. Tydskrifte word ten alle tye gebaseer op die marktendense en sal jou 'n paar uitstekende idees gee.

e.t.

2
hierdie werkstuk

Om 'n suksesvolle skrywer te wees

1 3
vorige werkstuk
Die grondbeginsels van skryf
volgende werkstuk
'n Blik in verskillende rigtings

 

 

 

 

 

 

Voordeur en inhoud | Jong woordvrate | Ouer woordvrate | epos


STORIEWERF word aangebied saam met woordvrate en storiemakers
van alle soorte en groottes
Gebou en onderhou deur Franci Greyling

(C) Franci Greyling 2000-2005