Siyolo trek sy geel en rooi trui aan, maar toe iets sy hand kielie, besef hy dat sy gunstelingtrui besig is om uit te rafel by die mou. Hy besluit om verskeie mense met wol van sy trui te help: elkeen op `n unieke manier.
BEKRONINGS:
M.E.R.-prys vir `n geïllustreerde boek 2008.
IBBY Ererol vir illustreerders 2009
Exclusive Books IBBY SA Toekenning 2009

Die verhaal speel af by `n elite privaat seunskool waar Greg Owen hoofseun is en Ekhardt, `n buitestander, in matriek by hulle aansluit. Reeds met die inisiasie van nuwelinge vorm `n band tussen die twee seuns. Die verhaal speel af by `n elite privaat seunskool waar Greg Owen hoofseun is en Ekhardt, `n buitestander, in matriek by hulle aansluit. Reeds met die inisiasie van nuwelinge vorm `n band tussen die twee seuns. Ekhardt erken dat hy `n voortreflike rekenaar hacker is en lei Greg in die geheime van die onderwereld in wat hom, onwillekeurig, in `n gevaarlike avontuur intrek.
BEKRONINGS:
Sanlamprys vir jeuglektuur,Silwer Afrikaans, 2007.

Prins Hi Po Kondri is baie siek. Hy sit net heeldag in die paleis en hy glimlag nooit. Al die koning se dokters het probeer, maar die klein prinsie word nie gesond nie. Toe laat kom die koning vir dokter Me Di Syn – wat sê prins Hi Po Kondri het sonlig en vars lug nodig, maar die prinsie weier om buite toe te gaan. Die wyse dokter Me Di Syn bedink toe `n baie slim plan en kort voor lank word `n ernstige saak `n heerlike speletjie . . . `n Pragtige verhaaltjie wat weer eens die helende krag van die natuur bevestig.
BEKRONINGS:
Katrine Harries-prys vir jeugboekillustrasies, 2001.

Tim Marais is op die vooraand van matriek. Op die oog af het hy alles wat hy wil hê – aantreklikheid, gewildheid en akademiese sukses – maar daar is by hom ’n ontevredenheid met sy voorstedelike bestaan wat hy nie mooi kan verstaan of beskryf nie. Die mense om hom dra by hiertoe: soos tannie Trisa, sy sangdosent, vir wie hy meer voel as wat hy behoort te voel – veral aangesien sy die ma is van sy beste vriend, Ruan. Tim se ouers, as voorbeelde van hoe hy nié wil word nie, dra daartoe by dat hy in `n sekere rigting beweeg. Wanneer dinge deur `n sameloop van omstandighede erg skeef loop slaan Tim met mening daardie rigting in.
BEKRONINGS:
Sanlam-prys vir Jeuglektuur 2005: Goue prys.

Jabulani sit in die modder vas en al probeer die ander olifante hoe, kan hulle hom nie uitkry nie. Gaan Jabulani gered word voordat hy doodgaan van honger en dors?
’n Splinternuwe reeks met stories en feite oor bedreigde diere sowel as inligting oor die organisasies wat hul beywer vir die bewaring van hierdie diere.

BEKRONINGS:
ATKV Kinderboektoekennings, 2006.

“Hier gebeur daar elke tien minute niks en tussenin gaan daar ook nie veel aan nie.” So praat Anton, een van die karakters in Pretpark, oor Rustenvrede, die stowwerige dorpie waar die verhaal afspeel. Daarom dat die besoek van die reisende pretpark met soveel afwagting gepaard gaan. Die gedagte aan `n hengse ferriswiel, spooktonnels en olifantritte en goed. En Madame Zelda se besoek aan die skool om die kinders solank `n voorskou te gee van al die pretpark se aanloklikhede – was dit regtig so onskuldig? Waarom kan Anton-hulle dan nie ontslae raak van die onheilspellende en vreeslik realisteise drome wat hulle snags het sedert hy en Johan en Karin gehipnotiseer is nie?
`n Lekker grillerige verhaal wat die leser van die begin af intrek en nie weer laat los nie!

BEKRONINGS:
ATKV Kinderboektoekennings, 2004.

Toe Makwelane gebore is, het haar pa haar hoog opgetel en gesê: “Hierdie kind is vir musiek gemaak. Makwelane sal haar naam wees. Makwelane musiekmaker.” Toe het hy vir haar `n makwelane, `n musiekmaker, gemaak.Van almal is Makwelane die liefste vir haar ouma wat langs die water bly. Maar om by Gogo te kom, moet jy al langs die rivier loop tot by die groot rots. Dit is baie ver, en in die rivier langs die pad bly `n nare krokodil. Makwelane kerm en kerm om by Gogo te gaan kuier en eendag toe sy grooet genoeg is, stem haar ouers in. Gewapen met haar musiekmaker op haar rug en haar pa en ma se waarskuwings oor die gevaarlike krokodil, vat Makwelane die pad Gogo toe.
Wat sy langs die pad beleef en hoe sy uiteindelik die sluwe krokodil uitoorlê, maak van hierdie `n lekker vrolike, avontuurvolle en boeiende storie – vol van die ritme en musiek van Afrika se veld, diere en mense.

BEKRONINGS:
Katrine Harries-prys vir jeugboekillustrasies, 2005.

Diep, diep in ’n donker bos, is die langverwagte opvolg op die topverkoper prenteboek, Babalela, wat reeds duisende jong lesers bekoor het. “Wie woon nog in die diep en donker bos?” wou almal weet, en sommer daar en dan is besluit om die Babalela se aanhangers bekend te stel aan die ander bosbewoners. Daar is Wrrrumpie, die haastige en lastige wurm; die humeurige Knortand wat na almal hap met sy skerp tande; Potifant met sy reuse pote, wat kyk waar hy trap, maar nie altyd trap waar hy kyk nie; die nuuskierige Meermoskat; die agt Fripperwakkies wat nie vir ’n oomblik ophou kwetter nie en natuurlik die Babalela, die enigste een wat al ooit ’n avontuur buite die bos beleef het. Maar nie vir lank nie… Die ander bosbewoners is vasbeslote om ook die wye wêreld buite die bos te gaan verken. Hulle hou egter nie rekening met al die gevare wat in die stad op hulle wag nie, en kort voor lank is al die bosdiere toegespyker in bokse. Sal die Babalela hulle uit hierdie verknorsing kan red?
Die animasiekunstenaars, Andries en Erica Maritz, is verantwoordelik vir die betowerende illustrasies.

BEKRONINGS:
Tienie Holloway-medalje vir kleuterliteratuur, 2006.

’n Versameling Afrikaans-verwerkte verse uit die Nederlandse skrywer van kabaret, kinderverse en stories, Annie M.G. Scmidt, se bundel: Ziezo. Annie M.G. Scmidt se werk het haar die titel: Die Koningin van Nederland besorg. Philip de Vos se voorliefde en talent vir die skryf van nonsensverse is hoofsaaklik deur haar werk geïnspireer wat gewoonlik vol humor en patos is. Die keuse van verse vir Die spree met foete is fyn beplan om in Afrikaans alle lesers en liefhebbers van verse, 7 – 70 jaar te bekoor met die wonder van twee uiters talentvolle kunstenaars se sin vir die humor van die eenvoudige, maar ook die absurde.
BEKRONINGS:
Katrine Harries-prys vir jeugboekillustrasies, 2002.