Gideon en Tom ontmoet Justie in die laundromat, tussen hulle vuil bondels klere. Op die oog af verskil hulle hemelsbreed, maar wat dié drie studente gemeen het is hul plofbare verhoudings met hul ouers: Tom se stiefma maak asof sy biologiese ma nooit bestaan het nie, Gideon is kwaad én magteloos oor sy ma se skelm verhouding en Justie misken haar alkoholis-ma heeltemal en besoek haar net een keer per jaar in die inrigting waar sy bly.
En dan is daar die liefde tussen Tom en Justie, ook breekbaar soos glas, wat moet heel bly tussen die draaie wat die lewe met hulle maak.

Breek het eers sukses behaal as toneelstuk voordat dit in romanvorm beslag gekry het. Die stuk was `n klinkende sukses by 2001 Klein Karoo sowel as Aardklop kunstefeeste.